Tuama Oki

Pe lama leh mama mo pulang, napa ni puru so baminta jatah. Tantu kwa ada bakarlota dulu… maklum ni minggu, mace bebas ! Papa ada ka luar kota, dapa dinas luar. Tinggal Qta deng mama noh yang di rumah. Biasa kalu hari minggu bagini, jadwal rutin makang tinutuan. Mar karna papa nda ada, otomatis nda ada yang mo beking. Qta lengkali ja tahaga bingo tiap kali lia papa ja momasa. Dari segi skill, jelas papa jaoh di atas mama. Tinorangsak, RW, Brenebon, nasi goreng sampe tinutuan aid kipas. Mar kalu mama, beking matasapi jo, lengkali ja manta tengah. Beda katu, dulu kata papa itu anak kost, jadi hidop mandiri. Kalu mama, anak manja, samua2 oma ja ator. Mar biar papa lebe jago momasa, Qta tetap paling suka kalu mama ja beking akang susu. Mungkin lantaran somo lapang taong ja beking, jadi mama so tau depe takaran pas. Bagitu le deng papa, dia suka skali mama pe kopi manis. Mar bagitu katu noh, samua ada depe spesialisasi.
Somo jam sambilan, mama blum beking2 ni smokol. Terpaksa musti bagera sandiri. Mie instant jo, supaya gampang mo beking. Bae leh ni kompor gas so jadi. Makang dulu ah, baru mo mandi.

“ Bobi…..Bobi….!!!” dapa dengar suara anak2 bapangge.
“Kiapa ??” Qta basuara dari dapur.
“ Manjo maso skolah minggu, pa Angel tre….”
“ Pa Angel ?? Tunggu dang, Qta mo mandi dulu !! Maso jo dudu di dalam..”

Pas dengar mo beking pa Angel, Qta langsung semangat mo pigi. Kan Angel itu orang kaya. Jadi paling mo dapa makang enak. Waktu skola minggu lalu, torang dapa makan nasi goreng enak lantaran banya daging kong pake sosis. So dapa makang, pulang leh bawa camu2. Pokoknya tiap kali skolah minggu pa Angel, tu anak2 lengkap mo datang, kecuali satu orang, Cella. Kiapa dia nimau datang ?? Lantaran dorang dua itu musuh abadi. Salalu ni dua cewe mo bersaing. Mulai dari baju, calana sampe capatu. Dua2 katu dari kluarga kaya. Angel pe papa, anggota dewan. Ni Cella pe papa, kapala dinas PU. Jadi dong dua pe kluarga banya doi. So itu lengkali, mama ja bagara pa Qta, kalu mo cari cewe, cari jo diantara dua itu, supaya kata bole hidop enak. Hidop enak ?? Bagimana so tu hidop enak ? Qta rasa torang pe hidop skarang le so tergolong enak !! Papa so tadudu di tampa bagus. Biar Cuma kepala biro, mar tu gaji so lebe dari cukup for biayai keluarga. Depe sadap leh, torang tiap bulan nda bingo2 mo bli bras. Soalnya, oma deng opa di gunung rutin ja kirim bras tiap bulan. Rumah bagus, oto ada, fasilitas lengkap, komputer, dvd , trus plus playstation. Pokoknya menurut Qta, hidop ini so enak !! Mungkin mama pe maksud, kalu Qta dapa cewe gaga, nda perlu siksa2 mo karja. Ah, Qta masi malas mo pikir2 tu dia… Masi jao !!!

Klar mandi, pilih baju. Musti pake bagus2, sapa tau Angel jatuh hati. Ah, masi kacili, mana tau dia tentang cinta. Kalu Qta kwa, biar umur 8 taong mar ni pikiran so dewasa. For apa tu papa pe buku2 amper satu kamar. Mulai dari buku filsafat, sastra sampe yang cinta2 ada. Jadi tiap kali nya ada hambak, Qta cari buku for mo baca. itong2 for tamba pengetahuan. Depe hasil Qta so bole rasa, Rangking 1 trus dari klas 2. Salalu dapa 9 for IPS deng Bahasa Indonesia. Jadi kalu mo bicara cinta, tinggal mo cari referensi pa gibran ato shakespeare. Mo taklukan pa Angel, itu gampang !!! Yang beking Qta malas, Angel lebe tinggi dari Qta. Maklum, pertumbuhan cewe lebe capat pas anak2. Tunggu jo kalu Qta so lewat, pasti Qta mo jadi deng Angel.

Kameja biru deng jins trus kets putih. Nya lupa bawa Alkitab.


“ so pastiu batunggu ??” Qta tanya.
“ nyanda, kan torang dua ada main PS “ Tian yang jawab.
“ io Bob, sabantar abis skolah minggu main ulang neh. Penasaran Qta noh, dia kase kalah “ Glen basuara.
“ lombo kwa ngana, io sbantar tong tiga beking Cup !!! “ Qta bagara pa Glen.
“ blum tantu, biar le tuan rumah “ Tian balas bagara.

Asik bacarita, kage nda rasa so sampe pa Angel pe rumah. Dan butul yang Qta bilang, banya yang datang. Tumben, Icha maso skolah minggu, biasa dia paling malas, maklum ja bangun jam spuluh katu !!. Dia itu ada panyaki tidor, nanti tatutu mata pas jam2 tiga pagi. So itu dia ja bangun lat. Lantaran panyaki, depe mama deng papa kase skolah pa icha di skolah yang depe jam siang. Mar taheran, kiapa ni hari Icha bole bangun pagi ?? mo cari makang kang ?!? biar jo katu yang penting hadir. Biasa sekitar 10 anak yang rajin maso skolah minggu, mar ni hari yang datang ada 23 anak. Mar tetap, Cella nda datang. Masi baku musuh kote dorang dua. Masalah pertama kwa jadi pas acara pohon terang. Kan waktu itu, anak2 skolah minggu mo main drama, tentang adam & hawa. Kong Cella deng Angel, sama2 suka mo jadi Hawa. Akhirnya dorang dua mulai baku musuh. Waktu itu, Angel yang jadi Hawa. Mar pas pawai paskah, Cella yang jadi Maria. Pokoknya dorang dua ini baersaing trus. Kalu Angel pake nike, Cella paling pake Adidas. Angel, nokia 6600, Cella nimau kalah, SonyErricson K 700i. Nintau sampe kapan dorang dua mo bagini. Mar kalu mo pilih, Qta lebe suka ja lia pa Cella. Dia itu cewe gaga, taiko depe mama yang pernah jadi noni Sulut. Tiap kali lia pa Cella, nda mo pastiu. Angel le katu cewe gaga, mar kwa kalah di gigi. Lantaran banya makan coklat, Angel pe gigi le jadi coklat kong lobang2. Mar kalu dia senyum tutu mulu, dapa lia sama deng putri. Apalagi kalu lia pa dia di dalam dorang pe oto BMW…bersinar !!!

Ibadah ni minggu, ka Nia yang pimpin. Anak2 dudu sopan mendengarkan pas ka Nia bacarita tentang perumpamaan anak yang hilang. Nya rasa, ibadah so klar. Anak2 pun so nya sabar mo lia menu apa ni hari. Yang baharap mo smokol, mungkin kecewa. Mar sebenarnya ini termasuk mewah. Bagimana nya mewah, tiap anak dapa satu dos dolphin donuts. Hitung jo brapa tu Angel pe mama ada kaluar doi. Kalu satu dos 10ribu, kali 23 brarti 230 ribu. Mar for orang kaya sama deng dorang, itu kecil !! Abis rekreasi, anak2 so mulai babilang mo pulang. Mo suka pulang capat, mo bakuriki bauni detektif conan.

Torang tiga pun langsung pulang. Sesuai rencana, Glen deng Tian pi rumah ulang, mo bermain. Sampe di rumah, mama so tunggu kote.



“ ih, bawa kukis situ eh… minta dang !! “
“ napa for mama jo, Qta lagi malas makan yg manis2 “
“ Eh, ngoni so makang ? disitu ada nasi kuning, makang jo !! “ mama batanya
“ makase, mar so kanyang noh, ada makang 2 donat kwa noh “ Glen bajawab
“ io, Qta le kanyang makang ni donat…” Tian sambung
“ Ooh, jadi so kanyang dang ? Bob, ngana dang? “
“ io, Qta mo makang, mar mo baganti dulu….”

Sementara baganti, Glen deng Tian so mulai bermain. Permainan favorit, winning eleven, nya perna pastiu. Dorang dua main, Qta makang dulu, lapar. Harap2 mo makang di skolah minggu, nda jadi. Dua bungkus nasi kuning abis Qta makang. Abis itu Qta ambe tu donat, makanan penutup !!
Sekitar dua jam, torang tiga bermain. Dan yang jadi juara, gampang mo tebak..Tuan Rumah !! Wajar, hari2 katu bermain. Glen deng Tian pulang, Qta langsung ambe buku PR. Somo kumpul beso, musti beking skarang supaya nya lupa. Biar susa, tetap musti beking. Matematika… pelajaran paling stenga mati. Nintau kiapa, kalu pelajaran2 ilmu pasti, ni otak lambat loading ! Mar jang tanya kalu pengetahuan sosial deng sastra, Qta kipas !!
Mungkin dari skarang Qta so bole perkirakan Qta pe kelanjutan hidop. Insinyur, nya mungkin. Dokter, apalagi….Yang ada di hayalan, pegawai negri sama deng papa. Ato jadi pengacara sama deng Om Bob. Mar kwa, Qta pe cita2 dari dulu cuma1 :“INGIN JADI TERKENAL“.
So itu Qta skarang sementara blajar main gitar, sapa tau jadi musisi jago. Cipta lagu bagus, beking torang jadi top plus banya doi. Qta ja menghayal, kalu Qta kata sementara bagitar di atas panggung, kong penonton ja bataria Qta pe nama : Bobi…Bobi….Bobi….!!! Mar bagimana mo top kalu Cuma mo baforo di manado. Sedangkan dorang nova sondakh so deng tempo ba karir, tetap biasa2 jo. Kalu mo suka top, Qta musti kaluar daerah. sama deng Once.
Mar skarang te so lebe gampang mo jadi top, so ada kontes2 idol.
Itu kwa cita2… yang beking Qta pusing skarang ini PR mate, Qta nintau depe rumus !! Qta pe salah le kwa, pas enci ja jelaskan, Qta Cuma menghayal. Mar bagimana nda mo menghayal, tu enci pe face bagus kwa mo menghayal akang. Mujur apa stou, Qta skolah di tampa yang depe guru2, parampuang samua. Kong rata2 leh gaga2. Bagi anak2 yang blum tau tu keindahan parampuang mungkin nda barasa. Mar Qta ini yang anak kacili mar pikiran dewasa, sadar kalu Qta ini mujur skali dapa guru gaga2. Biar dorang marah2, tetap dapa lia dorang pe vasung. Sama no deng enci Rina, guru mate. Paling kalu Qta nda dapa jawab ni PR, dia mo cubit pa Qta. Ah, pasrah jo noh…asik te, enci mo cubit, brarti dia perhatian !!

PR blum klar Qta so manganto, bobo dulu ah…
Tu rumah dapa lia so tua. Depe dinding so nda pernah ja cat, so kremos. Nya talalu basar, kong depe aneh Cuma satu pintu !! Sebenarnya nda niat mo maso, mar kiapa stou ni kaki ja bagra trus menuju tu pintu. Abis buka tu pintu, kaluar tu asap2 harum dari dalam rumah. Sapa pe ruma so ini ?? Lantaran penasaran, Qta bajalang trus ka dalam sampe Qta lia ni benda aneh. Mesin besar, trus ada pintu. So baabu ni pintu, setelah Qta lap, dapa baca no tu tulisan : time machine .Ah, masa ini mesin waktu ?? Qta lebe tamba penasaran. Langsung Qta buka no tu pintu. Di dalam Qta bingo mo lia ni kabel2 deng depe alat2 laeng. Mar ada tombol deng layar, GO TO deng PLACE. Qta pun langsung bapikir mo kamana kang yang bagus? masa depan ato masa lalu. Kalu mo suka kaya, Qta pi masa depan kong bli koran olahraga yang muat hasil2 pertandingan. Bale ulang kong bataruh deng tamang. Ah, mar itu nda asik noh… Ka masa lalu jo, mar kapan kang yang bagus. Pikir2, kage muncul ide pigi ka masa saat Qta lahir, 16 Mei 1991. Langsung Qta tindis tu tanggal, di PLACE, Qta tulis RS Gunung Wenang dalam kurung kamar Bobi Rawung lahir. Rasa so lengkap tu tujuan, Qta langsung tindis GO !!
Pusing…taputar-putar….kage Qta sadar so ada di Ruma Saki. Qta ada di dalam kamar mandi. Pas kaluar, nda ada orang di ruangan. Sementara melahirkan stou di ruang bersalin. Qta langsung kaluar, cari ruang bersalin. Qta tanya pa suster, dia bilang skarang ada satu ibu yang sementara dalam proses bersalin. Qta pe dalam hati, Qta itu !! Dia tunjung akang tu jalan, Qta langsung menuju… Lantaran tu ruangan Cuma pake kaca, jadi bole dapa lia noh tu proses. Qta cari2 lia, mana papa pe tampang… mo lia bagimana dia pas masi muda. So lia2, mar nda ada noh.. biar jo, terlambat stou… Qta langsung alihkan mata ka tampa bersalin. Dapa lia tu suster2 deng dokter sementara sibuk. Qta penasaran mo lia mama pe muka pas kase kaluar pa Qta. Suka mo lia mar tu suster ja peleh. Kage dapa lia so ada bayi yang merah2 suster so plo. Itu Qta !!! Geli ja lia, masi merah kong mungil skali. Pas Qta lia pa mama… ada yang ganjil noh… masa mama pe muka bagitu !! perasaan itu bukang mama… kong sapa dang ??
hiii… Sartje pe muka itu !!! Haaaa…. iyo noh, itu Sartje….oma pe pembantu !!


haaaaaaaaaaaa……………..!!!!!!!!!!!!!

Tabangun ! Cuma mimpi kote…Qta sadar, ni baju so basa lantaran basuar. Kiapa Qta mimpi bagitu kang ? Mungkin lantaran Qta ja mara2 pa Sartje stou ? Memang kalu Qta pi pa Oma pe rumah, Qta ganu ja lia pa Sartje… dia ja sok perhatian. Lengkali, Qta nda minta, dia yang inisiatif beking akang susu. Tau2 Qta Cuma suka mama yang ja beking.