Happy X'mas Mom

Hari ini samua penghuni Rutan Malendeng shock. Dorang takage da lia tu menu makan siang. Biasanya cuma sayor kangkong deng so mujur kalu dapa ikang garam. Ni kali, menu istimewa...Nasi campur Padang, ada ayam, perkedel, acar plus podeng. Sapa yang nyanda mo bingo deng ni kejadian langka. Sedangkan tu sipir- sipir penjaga le heran da lia tu tumpukan dos makanan. Pembagian jatah makan siang langsung heboh. Samua suka mo bakurebe di muka. Apalagi for tahanan ato napi yang nda perna dapa besuk, dorang kadang ja makang ena, paling cuma ja dapa tampias dari tamang pe besukan. Pokoknya penghuni blok Anggrek, Melati deng Asoka langsung antri mo ambe jatah. Ada dua blok yang nda talalu antusias karna dorang itu laeng. Blok Kamboja deng Sakura itu hunian khusus. Kalo tu pengedar dg pemakai narkoba takumpul di blok Sakura. Sedangkan di blok Kamboja, punung deng napi ato tahanan kasus elit. Mulai dari koruptor, bankers, makelar sampe mantan Kadis takumpul disitu. Masalah makanan enak bukang topik yang menarik for dorang. Maklum, tiap hari dorang ja makang sadap. Besukan dari keluarga, tamang kantor ato anak buah salalu ja bawa makanan yang beking napi laeng malele ewe. Dorang lebe antusias kalu mo dengar tentang kebijakan bebas pake hp. Tapi namanya penjara, biar le tiap hari makang enak, tetap tu tidor nda nyeyak.

“woi..jang ba soso kwa...”
“popo ngana eh...!”
“antri kwa...”
Suasana antri mulai nyanda ta ator. Samua suka baku ruju. Dorang tako jang sampe abis tu makanan dos. Total penghuni ada 283. Kase kurang deng yang borju- borju, sekitar 250 orang da baku sesa, kecuali ni laki-laki pake singlet putih.
Dia nda iko barisan, langsung ka muka kong ambe dua dos. Nyanda ada yang protes. Mungkin cuma tahanan- tahanan yang baru maso da heran batanya, kiapa ni laki-laki nda dapa togor?

“Yop, sapa dia?” tahanan baru batanya pa depe tamang yang somo tiga bulan nginap di bui malendeng.
“sst..badiang ngana, jang sampe dia dapa dengar !!”
Situasi hening sejenak sampe tu laki-laki singlet putih so pigi pa depe kamar. Klar dia maso, rame ulang. Ternyata nyanda guna da baku-baku ruju, karna tu makanan tahede-hede. Samua dapa, sampe tu napi-napi elit dapa pembagian. Cek para cek, ini makanan sumbangan dari calon kandidat Walikota, Tammy Bernadette.

Kamar Melati 5 nyanda talalu basar. Depe normal, bole tampung 10 orang, Lima di koi beton, lima sisa ba alas di lante. Mar skarang, Melati 5 ada 17 penghuni. Ini kamar khusus for tahanan ato napi di bawah umur. Jadi tu pranggang-pranggang mulai dari papancuri, panjudi, pamabo, pambakalae sampe pranggang cabul takumpul disini. Kamar so dapa rasa sesak, mar bae le dekat tampa televisi. Jadi bole bauni sampe lat. Skarang ni pranggang-pranggang sementara asik ba makang.

“huuu...bagini kwa tiap hari !” Yopi basuara abis se klar depe makanan.
“io kang, kalu makang ena bagini, kita suka disini trus..”Okta le iko basuara. Ni tahanan baru memang sadiki tatoki. Dia maso bui cuma gara-gara pegang cewe pe panta.
“luji, ngana jo yang hidop disini trus !!” Yopi nda sanang deng okta pe ontak.
“mar Yop...sapa dang tu laki-laki tadi pake singlet?” Okta batanya.
“Ngana nintau so?”Yopi bale tanya.
“io nintau. Rupa pengaruh dia kang? Masa nda ba antri kong le ambe dua dos.” Okta masi penasaran.
“so dia tu dorang ja pangge BESI” Yopi coba jawab.
“BESI ??” Okta masi suka cari tau.
“kita le nintau depe nama asli, mar torang ja pangge pa dia BESI. Dia itu napi pertama disini. Kita dengar depe vonis 20 taong. So brapa kali pindah LP, perna di Tuminting deng Papakelan. Pas ni Malendeng mo buka, dia tapilih jadi penghuni pertama skaligus jadi kumtua. Yang kita tau dia itu jarang bacirita.” Yopi so jelaskan tentang sosok laki-laki bersinglet putih.
“kiapa dorang ja pangge BESI ?” Okta batanya ulang.
“kalo menurut carita, dia pe kasus 340 dg 338 ada hubungan erat deng besi. Tu korban-korban yang dia bunung, mati karna besi. Yang qta tau, dia da bunung satu keluarga. So itu vonis 20 taong. Sebenarnya tre hukuman seumur hidup mar BESI da nae banding.” rupanya Yopi banya tau tentang ni laki-laki singlet putih.
“satu keluarga ?” Okta penasaran
“io..dorang itu BESI pe majikan. Dia karja di toko bangunan. Kong satu waktu , depe Bos tuduh dia da pancuri besi kong da beking rusak Bos pe truk . Singkat carita, nintau karna tersinggung ato so mabo deng iblis so pake, BESI bunung depe majikan...laki bini deng anak dua.”
“wow !?” Okta totofore da dengar.
“mar versi laeng bilang, dia ja dapa pangge BESI karna depe badan so bobou besi, talalu lama di penjara !!”

Biar baru 1x ba sumbang makanan dos, Tammy Bernadette langsung top di Malaendeng. Samua penasaran mo lia bagimana ni calon Walikota pe wujud. Dapa kabar dari depe tim sukses, Tammy Bernadette mo iko ibadah natal di Rutan Malendeng skaligus mo kase diakonia. Tu napi-napi deng tahanan langsung sanang da dengar ni brita. Dorang pe mau bole mo terkabul, bakudap langsung deng Tammy Bernadette. Selama ini dorang cuma ja lia di koran ato televisi. Memang Tammy itu figur penuh kontroversi. Mar yang utama, dia itu vasung. Namanya penjara kalu bicara tentang parampuang gaga, nda mo abis-abis tu diskusi. Kepastian Tammy mo datang ba ibadah natal so beking Rutan Malendeng heboh. Skarang tiap kamar so rajin ja latihan manyanyi. Dorang suka mo sumbang suara pas jeda khotbah. Nyanda terkecuali, samua blok sibuk latihan.

Sehari sebelum natal, pengurus Greja so persiapkan perlengkapan. Mulai dari tata cara ibadah sampe kursi deng bangku so beres. Pujian sebelum dan sesudah khotbah so dapa tau depe banyak, 18 grup. Samua so persiapkan lagu. Selain manyanyi, tu napi deng tahanan mulai persiapkan penampilan. Buktinya, tu stok minya rambu di koperasi langsung abis. Samua suka mo tampil neces. Sapa tau Tammy Bernadette terkesan, kan dia blum kaweng. Ada gosip bilang, Tammy suka laki-laki macho deng jago manyanyi. Mungkin kalu olah vokal deng suara cuma pas-pasan. Mar status sebagai napi mungkin bole dapa kesan macho. Di kamus pikirannya Yopi & Okta, Napi = macho, jantan, liar.

Tanggal 25 Desember itu hari spesial for umat Nasrani. Samua mo maso Greja. Entah karna mo pamer baju deng spatu baru ato memang mo ba ibadah . Greja-greja vol deng jemaat. Kalo Greja laeng ada ibadah subuh deng sore, di Rutan Malendeng jadwal cuma 1x . Jemaat Abigael Malendeng nyanda sama deng Greja-greja laeng. Disini nda ada Penatua deng Syamas, yang ada Cuma pengurus Greja. Dorang ada 2 orang, napi kasus pencurian deng napi kasus cabul. Nyanda penting bicara dorang pe latar belakang, yang pasti dorang skarang sementara melayani Tuhan.

Jam stenga 9, Greja Abigael so vol. Selain karna mo ada tamu khusus, Greja vol deng napi pe keluarga. Banya yang suka rayakan natal deng orang-orang tercinta, biar di penjara. Lantaran so padat, jadi musti tamba kursi deng bangku. Tepat pukul 9, Tammy Bernadette sampe di Greja. Dia langsung jadi pusat perhatian. Samua mata tatuju pa dia. Kali ini, Tammy pe penampilan minimalis. Mar tetap maksimal for arjuna-arjuna Malendeng. Ibadah pun dimulai. Berjalan lancar deng tamba menarik pas sesi puji-pujian dari tiap grup ato perwakilan. Tammy Bernadette pun kagum da lia ni talenta yang ada. Dia pun nyanda ketinggalan mo lantunkan pujian natal, “o holly night”. Ternyata depe suara nyanda beda-beda jao deng Mariah Carey.

Aplaus pun bersahutan pas Tammy klar manyanyi. Biar tu laeng nda mangarti apa tu lagu pe arti karna pake bahasanya David Beckham. Klar manyanyi, cuap-cuap sadiki tentang rencana pencalonan Walikota, Tammy langsung kase tu diakonia secara simbolis pa pengurus Greja, satu set alat musik (keyboard,drum,gitar plus sound system). Itu for Greja Abigael, sdangkan diakonia amplop for napi nanti klar ibadah pas sesi jabat tangan. Sebenarnya abis Tammy manyanyi, Pendeta so siap mo lanjut ka persembahan, mar masi ada kote yang mo bawa puji-pujian. Bukang vokal grup mar solo. Perwakilan kamar asimilasi alias tua-tua malendeng, laki-laki identik deng singlet putih yaitu BESI, mo manyanyi. Samua tahaga, kage !. Selama ini, BESI nda perna manyanyi di Greja. Di dalam sel pun, kadang ja dapa dengar depe suara mo bersenandung. Paling cuma pas dia bauni depe sinetron favorit, “Cinta dan Anugrah”, BESI ja manyanyi ST 12 pe lagu. Itu pun cuma samar-samar. Otomatis,momen BESI mo manyanyi lagu rohani beking samua kage. Suasana pun hening...BESI pegang gitar akustik kong mulai bermain,

...teringat saat natal bersama di kampung halamanku, terkenang
wajah mama papa yang aku kasihi
bertahun sudah kita tak jumpa, hati ini sangat rindu
Tuhan sertailah mereka

...kini satu lagi tahun berganti di hari hidup kita ini
adakah kita kan bertemu, adakah Tuhan
selangkah saja maut menghampiri, pada hidup kita ini
Tuhan sertailah mereka...

Memang ni lagu so banya kali ja dengar. Di kaset tape, mp3, di radio ato di mikro. Mar kiapa stou ini kali depe nuansa beda skali. Dengar ni lagu di Penjara kong yang manyanyi napi hukuman 20 tahun bekeng ni jemaat yang hadir langsung bakaca-kaca. Ni lagu tasontong skali di hati. Tammy Bernadette pun ambe lengso di tas.

...bila ku ingat kembali, kasih sayangmu yang tlah
membesarkan daku
ingin rasanya ku kembali, pada manisnya masa
kecilku dulu,
mama...selamat natal mama...
papa...selamat natal papa...
mama...
papa...

Abis reff, BESI mulai ba melodi. Memang nda sama deng Slash, mar di momen bagini rupanya BESI pe skill gitar, mengalir bagus..blues skali. BESI main deng penghayatan tinggi dan klimaksnya...napi sekelas BESI ternyata nda mampu tahang tu aer mata mo maleleh...dia so nda dapa tahang !

Besi so nda dapa manyanyi, tingal ba gitar.

...mama...selamat natal mama
papa...selamat natal papa
mama...selamat tahun baru
papa...selamat tahun baru

So bukang BESI yang manyanyi, jemaat yang so ganti ba koor sama-sama.
Manyanyi kong seka-seka tu pipi...lengso punung deng aer mata

Yopi berbage tissue deng Okta.

bulan banya doi !

nya dapa rasa, skarang so bulan desember...
bagi umat kristiani, somo natal. memang nanti tgl 25 tu natal mar depe perayaan so mulai dari awal bulan desember.
mulai dari santa claus sampe ibadah pohon terang dari kolom, rukun, sampe di greja.
kalo anak2, paling suka tu santa claus. bbiar dorang tako pa swartepit...mar drg sanang mo dapa kado dari om santa...otomatis orangtua musti kaluar doi.
kalo for pohon trang, bukang sadiki tu mama dg papa yg suka bagaya pake baju baru.
jadi drg pi baku ruju di mall ato ka 45 for cari kameja dg gaun.
Blum le tu mama ja ba pasang pohon trang, musti sadia depe pernak pernik.
trus tu anak2 ma'ere minta bli roket, bunga api. aer mancur deng petasan.
Mama2 le bingo mo beking kukis mentega deng kumpul soft drink.
kalo yg so iko paket, mungkin sadiki lega karna so ada persiapan.
sdangkan papa2, bingo mo cari FO ato SO for persiapan miras party...

Memang bulan Desember penuh berkat...
qta masi suka batulis mar kiapa stou ni kom ba hang..maklum cuma di warnet!!

ok...nanti brikut jo mo ba lamu ulang...
ciao....

TamBio voor Manado 2010 !

Tepat jam 13.13 Wita, Tammy Bernadette mendaftar sebagai calon Walikota Manado di salah satu Partai yang terkenal karna cenderung Pro Rakyat. Selain Tammy, yang so mendaftar ada banya. Mulai dari pengusaha, politikus sampe birokrat. Mungkin Cuma Tammy yang talaeng, kupu-kupu liar ! Bukan cuma Tammy yang beking heboh, ada leh yang mendaftar sama-sama, mar sebagai calon Wakil Walikota Manado, depe nama Biovinco. Ni calon paling talaeng, karna dia bukang parampuang mar nimau mangaku laki-laki. Yup, Biovinco itu stenga manta. Dan Tammy pun suka mo ba par deng Biovinco. Jadi ni duet pe nama TamBio (Tammy-Biovinco).
Duet ini pigi mendaftar diantar dorang pe pendukung. Sekitar 500 orang pake kaos warna pink ada datang sama-sama di sekretariat Partai. Proses mendaftar ini jadi pusat perhatian karna tu Tammy deng Biovinco pe massa samua pake tank top deng hot pants ato rok mini. Warga yang ada di dalam mikro ato oto pribadi, di atas motor deng yang ada di sekitar sekretariat dapa pemandangan bagus. Tu om-om deng nyong-nyong riki ja malele ewe ja lia ni rombongan span-span. Padahal kalo mo taru kira bae-bae, nda samua yang pake mini itu parampuang. Sekitar stenga, itu Biovinco pe tamang-tamang komunitas yang biasa ja mangkal di jalan Sarapung. Mar lantaran siang tenga hari bolong, so nda dapa kantara mana yang original deng mana tu chasing palsu. Dorang samua pake tank top mermud yang ada tulisan sablon,
“ TamBio voor Manado 2010 ”
Menuju Kota Multiorgasme !!
Pendaftaran ini banya wartawan yang datang. Dorang penasaran mo dengar bagimana ni lonte deng bencong pe konsep, visi-misi, program deng kesiapan finansial for mo iko suksesi. Pihak partai le kage, nda sangka mo dapa pendaftar yang laeng daripada yang laeng.
Klar ba isi formulir pendaftaran, Tammy langsung wartawan malendong. Ada wartawan yang badekat kong langsung batanya,
“kiapa ngana suka bacalon Walikota? Padahal ngana pe profesi banya orang hina..”
Tammy ba jawab dengan diplomatis,
“kita maju ba calon karna terpanggil for mo bawa Manado menuju puncak...Karna selama ini Manado blum dapa depe sentuhan. Kalu mo jujur,menurut Tammy...Manado pe G-Spot blum takore !!”
Wartawan lebe semangat mo wawancara.
“Nda tako mo bersaing deng para politikus, birokrat deng pengusaha?”tanya wartawan.
Masi deng gaya khas, Tammy ba jawab,
“Masyarakat butuh pilihan....Mungkin rakyat so tabiasa deng calon laeng yg cuma A ato B, skarang kita mo tawarkan X !”
Masi blum puas, wartawan ba tanya ulang.
“Bagimana tentang korupsi ?”
Tanpa tunggu lama, Tammy langsung jawab,
“Korupsi itu samua berawal dari nda transparannya pengelolaan deng mental pegawai yang matre. Kalo Tammy yang jadi Walikota, samua akan transparan !!Karna kita suka keterbukaan...Tammy mau bangun pemerintahan yang jujur.”

Selain Tammy, wartawan laeng ba rapat pa Biovinco. Mungkin dalam sejarah, baru kali ini ada stenga manta mo ba calon.
“Apa yang beking ngana suka ba calon?”tanya wartawan.
“Bio mo suka Manado jadi lebe vasung.”
“Contohnya ?“ wartawan batanya ulang.
Biovinco pun kase penjelasan,
“Sebagai seorang stylist, Bio so pengalaman ja rubah yang biasa jadi gaga. Itu jadi motivasi for mo bekeng ni kota jadi lebe vasung. Contoh, Bio mo rubah tu seragam pegawai di Airport jadi lebe modis, supaya tu wisatawan langsung terkesan pas sampe di Manado”.
Pihak partai nyanda sangka kalo pendaftaran Tam-Bio jadi pusat perhatian. Wartawan pun minta tanggapan dari Bpk. Westerling, Ketua Partai.
“Torang sangat senang bole trima berkas pencalonan duet TamBio. Bagi partai, Tammy adalah sosok Bukan Perempuan Biasa. Tapi tentunya tiap kandidat harus memenuhi unsur-unsur dan melewati tahapan yang berlaku di partai. Adapun tahapannya adalah penjaringan, verifikasi serta survey. Kemudian pihak DPP akan menentukan ketetapan siapa yang akan diusung.” Ujar Pak Westerling.
“Tapi menurut Ketua, bagimana TamBio pe kans ?” wartawan tanya trus.
“Samua calon punya peluang yang sama. Yang paling menentukan adalah survey, dan figur populer sama deng Tammy adalah magnet for pemilih. Di balik kontroversi yang ada, duet TamBio terbukti so punya konsep yang jelas serta massa pendukung militan.”
Ketua Partai dapa lia semangat karna Tammy ja haga trus pa dia. Sapa yang nda mo geer kalo ada parampuang gaga ja haga.
Di acara wawancara ini, duet TamBio da se bocoran tentang program 100 hari.
1. Pesta Rakyat selama 100 Hari non stop.
Kalo memang TamBio menang, otomatis musti dirayakan. Pesta ini for samua rakyat Manado. Kota mo rame trus, ba pesta sampe lalah. Masalah dana, murni hasil sumbangan yang takumpul dari donatur tetap yang kebanyakan Tammy pe langganan. Karna Tammy paling suka pa Pussycat Dolls sedangkan Biovinco tagila-gila pa Ricky Martin, jadi di Pesta Rakyat mo undang pa dorang. Selain musik, Manado mo rame deng karnaval sama deng di Brasil, trus festival Film sama deng di Cannes deng pertunjukan teater non stop sama deng di broadway. Pokoknya kota Manado mo ba pesta 100 hari non stop.

2. Program Back to Home.
Ini adalah ide brilian dari Tammy. Dia suka mo pangge tu samua parampuang Manado yang ada di segala penjuru khususnya yang terjun di dunia baku goso. So banya tu carita tentang cewe-cewe Manado yang katanya paling banya kaum hidung belang cari. Dorang pe face deng bodi beking cewe Manado jadi top request di samua tampa baku goso deng baku ojo. For apa mancari di luar daerah kalo bole mo ba karir di kampung halaman. Depe maksud utama program ini, for mo dukung Manado jadi Kota Pariwisata Dunia. Manado musti ada produk unggulan. Jadi selain Bunaken, Manado punya pesona gadis lokal yang nda ada di laeng tampa. Dengan takumpulnya seluruh parampuang bayaran asal Manado, otomatis dorang pe pelanggan mo suka datang ka Manado.

3. Lokalisasi Resmi
Kalo program Back to Home berjalan lancar, maka Manado musti ada lokalisasi. Bisnis baku goso ini depe perputaran doi lancar. Makin bagus penampilan, makin mahal depe harga. Dengan adanya lokalisasi resmi, maka disinilah Pusat Bisnis baku goso. Pihak customer jadi senang karna masalah harga jadi terbuka, deng so nda bingo deng ma’ja. Di lokalisasi ini, mo ada kompetisi dengan mengutamakan kualitas. Karna para pekerja sadar, customer cuma suka yang terbaik. Dan yang mantap pasti depe tarif mahal. Idealnya ni lokalisasi mo badiri di dekat pante, supaya pemandangan bagus. Trus tiap minggu, tim kesehatan mo datang ba check up. Depe inti, lokalisasi ini mo bekeng samua jadi lebe jujur, lebe terbuka…sapa yang lonte, sapa yang maniso, samua mo dapa tau !

4. Legalisasi Judi
Masalah judi di Manado so kompleks. Kaum kaya hobi se abis doi di amusemen, sedangkan kaum pas-pasan biasa ja main ampa daong ato manyabung ayam. Judi so jadi hobi deng lama-lama somo jadi gaya hidup. Apa salahnya kalo judi ini dilegalkan kong ator di satu tampa, supaya takontrol. Mo beking satu area, tampa orang bajudi sama deng di las vegas ato makao. Mar deng ciri khas judi kota Manado. Pemerentah bole tatamba PAD, trus Polisi so lebe gampang mo control mana tu panjudi karna dorang so takumpul di satu tampa, so nda mo bingo pi razia di lorong-lorong.

5. Program Lainnya
Nda usa talalu banya bajanji, karna 100 hari itu nda lama. Jadi selain program utama, Duet TamBio pasti mo lakukan pembenahan di segala sektor. Ada leh prioritas laeng sama deng kase maju tu PERSMA. Ato beking rekor dunia baru, Minum Cap Tikus Massal.

Wartawan deng pihak partai Cuma tahaga deng tabingo-bingo pas dengar ni pasangan TamBio pe rencana program. Wartawan pun lebe penasaran mo cari tau sap ni Tammy deng Biovinco. Hasil penelusuran via google :
- Tammy Bernadette :
Wanita vasung ini punya pesona yang beking banya laki-laki takluk. Terjun ke dunia prostitusi sejak SMA. Bukang mo mancari materi mar lebe tertarik for salurkan depe libido. Lantaran depe gaga, Tammy akhirnya jadi “Diva” di dunia baku goso. Tammy pe tarif check in fantastis. For 1x check in, dia bole dapa Laptop Toshiba deng iPhone plus 2 blackberry. Blum depe income kalo order weekend. Bole mo dapa cicil rumah di citraland. Nintau apa depe kelebihan sampe Tammy pe harta takumpul banya. Menurut orang pe karlota, Tammy pe hasrat dapa tako alias sex tinggi. Jadi tiap kali baku goso, Tammy salalu antusias deng nya perna menempatkan diri sebagai lonte. Tiap trima order, Tammy mo nikmati sama deng da ba’tona. Otomatis samua customer puas deng ketagihan. Tammy tertarik terjun ke dunia politik, konon karna ada pejabat yang backing. Dia yang mo ongkos Tammy pe pencalonan. Mar ada le versi laeng bilang, Tammy maju ba calon Walikota karna dukungan dari hugh hefner. Ni bos Majalah kelinci suka skali pa Tammy. Dia mo bekeng dunia heboh saat ada Walikota mo jadi sampul majalah Playboy. Nintau mana yang butul, mar yang pasti Tammy Bernadette nda main-main. Dia so siapkan samua for pencalonan. Mulai dari dana kampanye, tim sukses sampe relawan-relawan di lorong.

- Biovinco :
Sebenarnya kalo normal, Biovinco itu laki-laki bataru. So itu, banya cewe yang manyasal kiapa Bio bole jadi stenga manta. Nda banya yang tau tentang Biovinco, karna dia itu tertutup. Dia Cuma suka bicara tentang depe usaha salon yang sekarang so ada 7 cabang. Bio le terkenal karna punya banya stok cewe model yang bole mo booking. Dia suka ba calon Wakil mWalikota karna mo bantu pa depe tamang bae, Tammy Bernadette. Satu yang pasti, Biovinco suka mo rubah tu gaya penampilan pegawai-pegawai.

Karna masi terkesan misterius, wartawan masi bakumpul mo cari tau tentang Biovinco. Mar sosok yang dicari, Cuma sibuk ba buka facebook. Dia da ba tulis di wall nya Alfredo Sroideman :
…Happy Birthday honey…semoga panjang umur neh,deng tu karya2 lebe mantap…
Sorry, Bio mo pulang lat, masi sibuk deng Tammy….LuvU Forever !!....

t . o . r . n

k . o . r . n

c . o . r . n

p . o . r . n

b . o . r . n

nya war !!

m.i.l.f ato lolita ??
aah. ibiza babes jo !

Welcome November (maybe) Rain !!

Akhirnya sampe juga di bulan ke seblas..
yup,skarang so bulan november!
kalo axl rose bilang november rain...
mudah2n jo mo banya ujan supayan ni PLN nda banya alasan.
Selama ini Manado dan sekitarnya lagi musim lilin!!
tiap hari mati lampu..minimal 3 jam.
PLN pe alasan tu aer di Danau Tondano lagi turun karna kemarau,jadi tu PLTA di
Tanggari dg Tonsea Lama nda kerja maksimal.
Yah, torang sbg rakyat cuma bole pasrah dg kondisi ini...
Sebenarnya prosesi malam kudus masi 1 bulan leh mar skarang somo amper tiap malam
lilin menghiasi tiap rumah...
Yg tragis, ada brapa rumah yg tabakar cuma gara2 lilin !



Selain lilin, Manado lagi rame deng suara genset!
mo yg solar ato bensin, genset jadi primadona...
bagi yg banya doi, tantu bole bli genset. mar bagi torang rakyat biasa,
apalagi for seniman dg penulis yg sdangkan doi makang ja ba hemat..
mana bole mo bli genset ???

Semoga jo di bulan yg baru ini, PLN bole lebe baku mangarti...

btw..for tamang2 yg so maso ni blog, makase neh...
sebenarnya banya materi puisi dg cerpen baru yg mo posting
mar karna komputer di rmh tamaso virus, jd blum riki2 tambah materi...
moga2 ni bulan tu komp so jadi supaya ni karya2 bole meluncur!

ciaoo....

1 Taong !!

Tgl 24 Oktober..
nda rasa so satu taong berlalu!
ni cobaan sama deng ombak basar yg datang tiba2...
padahal waktu itu smentara santai di pinggir pante paser putih
pake acakatam itam dg minum SoB...
kage2 datang ombak sama dg tsunami...
basah..malamise...
mar bae le nda anyor...

memang ni ujian pe berat skali,mar qta yakin samua ada depe jalan kaluar..
ni pengalaman jadi momen spesial yg beking qta pe inspirasi for karya2!

tgu jo sadiki le, banya sebaxxx pe karya somo menggebrak..!
napa kwa kom di rmh ba virus,jadi ja takendu-kendu baketik...

keep rock'n roll !!

Football Mania

Kemarin kualifikasi piala dunia 2010 zona eropa baru klar...
ada yg manangis,ada yg bahura..pesta sampe pagi!!
memang di zona eropa banya kejutan.
ada tim yg baru kali ini maso piala dunia,yaitu slovakia.
ni negara baru merdeka blum lama. dorang mampu se keok pa drg pe negara saudara, ceko.
Selain Slovakia, yg lolos langsung adalah Denmark, Jerman, Spanyol, Inggris, Serbia, Italia , Belanda, Swiss.
Mengejutkan karna ada brapa tim besar musti berjuang di play off, sama dg prancis, portugal dg yunani. Ada tre yg nda lolos sama skali, Turki, Ceko, Kroasia dg Swedia.
Kalo menurut qta, tim dari Eropa berpeluang besar mo juara...
Belanda, Itali, Inggris deng Spanyol favorit juara.

Tapi qta pe ayang tetap BELANDA !!
Ni kali komang dorang musti juara...
Van Persie,Robben,Kuyt dkk pasti so lebe siap mental.
kalo di euro 2008 drg so fantastis mar mental blum kuat.
skarang di Afsel 2010 Belanda pasti mo kipas.

Ulasan sepakbola mo menghiasi qta pe blog karna bolakaki adalah olahraga paling top di dunia...dulu waktu popoji masi tabal, qta rajin main futsal...
skarang pope...tinggal main bola di PS...

ok...tgu ulasan bola selanjutnya..

So Oktober !

Nda rasa so sampe di bulan ka spuluh taong 2009. So nda lama ni taong somo klar..
sebenarnya banya skali ni karya mo suka posting,tu memory imajinasi so banya!mar ja tatahang karna ada banya pengganggu!!
dan pengganggu paling utama saat ini adalah poker...
nintau kiapa,tiap hari musti bermain. rasa2 mo gila kalo nda bermain.
mudah2an ni virus cuma sesaat!
alasan laeng yg beking qta malas baketik krn tu komputer di rmh ba virus...
sebenarnya so suka bli laptop..mar masi banya keperluan laeng!
sadiki le qta pe anak somo harijadi, otomatis musti batabung for beking depe acara hut.
blum depe keperluan hari2..susu nutrilon,popok mamypoko, perlengkapan cussons, pigeon,bubur nestle..dll!
mar, so bagitu noh kalo ada anak...
pokoknya dalam minggu ini ada brapa karya yg qta mo posting!

btw, for tamang2 yg so maso ni blog...makase neh!

Long Trip

manado - tondano

tondano - manado

cape..mar biar jo yg penting bole lia dunia!!

2 Kelawar

suka mo batulis mar...

fold jo !!
nanti brikut jo...mo all in!

Rasa

kalu memang nimau bilang kwa dari awal!
qta so nda mo baharap...
kalu ngana rasa pastiu bilang kwa!
qta le so nda mo paksa...
kalu cuma suka batamang,
qta mangarti!

memang qta bukang brad pitt
nda kaya sama deng bill gates
deng nda forsa rupa beckham

mar qta pe hati ngana nintau...

makase ngana so kase rasa,
rasa yang susa mo ilang..

Span Brothers Accident

Span06 : minum di sini jo, kadang2 leh bakumpul pa sebaxx
Rey : ok..minum sini jo! Bagimana Ju?
Borju : bole no kalo ngoni masi suka…napa pi bli jo!(se keluar 100rb)
Sebax,Palo,Gotz : ator jo !
Rey : bli FO dg Bir itam jo depe sisa rook
Span06 : Bir puti jo,da start daritadi itu
Rey : pi bli jo dang,sapa yg mo pigi?
Span06 : nanti qta..mar sapa antar motor?
Borju : napa pake qt ape motor jo
Span04 : qta jo..(lgsg ambe kunci motor)
Span06 : ado..qta ragu kalu dia
Rey : nyanda apa2,percaya kwa…
Span06 : orang laeng jo kwa
Rey : sudah..dia jo!sm lebe lat..pi bli di sei orlane jo

Akhirnya span06 dan span04 pigi babli.
Karna cairan so abis, jd anak2 Cuma bacarita dari dulu2 smp topic yg update

30 menit so lewat, span brothers blum sampe2.

Anak2 pun masi tetap asik conversation.
Kage bunyi motor Revo dapa dengar.

Span06 : so bilang kwa jg dia yg bawa,trg cilaka

Anak2 masi blum percaya…
Trus span04 datang deng kondisi muka so punung luka,badara-dara..

Anak2 : kiapa ngoni?
Span06 : napa dia kwa da ngebut kong dia sambar tu komandan
Span04 : borju, sori tu motor jatung
Borju : ???????

Revo 2009 baru ambe kemarin so lecet!

Borju : nda usa pikir tu motor,ngoni tre pe diri!
Span06 : depe sala kwa ini, laju2…tu komandan bapotong trg sambar
Span04 : dia yg salah,kiapa dia ba potong kage kong nda menghindar
Span06 : ah,ngana kwa talalu laju..
Span04 : laju bagimana Cuma lari 60
Span06 : ngana le da mo bakuambe deng tu komandan
Span04 : dia kwa yg sala
Span06 : amper dorang tambor pa torang
Span04 : badiang jo ngana…io qta yg sala
Span06 : ngana le mo bakuambe.brarti nga nda trima kritikan
Span04 : co badiang jo, napa ni luka so pidis…memang le muka so bisae pi cilaka, tatamba ancor noh..

Anak2 masi shock nda percaya..
Drg so terlanjur bagambar FO dg bir…eh yg muncul span brothers so cedera

Ni carita bukang fiktif mar memang butul2 terjadi !!
For kenyamanan privasi, tu nama2 pake nickname.
Cuma tetap ada sensor sadiki,contoh: waktu span brother bk ambe…banya kata2 nda layak diumbar…
Cuma yg paling membekas pa tuanrumah pe pikiran tu span 04 pe kata2…

Memang le muka so bisae…tatamba ancor noh !

Father, Son and Rock n Roll !

Highlander

tiap harijadi manusia tatambah umur ato tre jadi takurang 1 taong hidup?
yg pasti qta nda mo masalahkan ttg umur yg panjang..buktinya klub 27(kurt,jimmi,janis,jim & more) itu jd legenda biar umur blm riki stengah abad.
jadi yg paling utama adalah bagimana mo jadi manusia yg abadi bukan cuma sebatas usia.
biar so mati mar kalu depe karya2 fenomenal dg syarat utama musti eksis pasti akan jadi abadi ! nda cuma org mo pasang akang lilin pas natal ato taong baru di kubur..

memang menuju keabadian butuh perjuangan...
tapi menurut qta, skarang ini situasi so mendingan for para sastrawan dan seniman.
teknologi yg lebe canggih, trus samua so serba instant dg praktis jadi suatu peluang for para pemikir dan para pemimpi utk mengekspresikan drg pe kegilaan!
kalo mo bandingkan dg jaman 777,999,99 trus Cinco dg Lusy...skarang ini lebe ena!
proses produksi buku sampe depe launching dg publikasi so bukang perkara sulit.

yg masi jd persoalan, sejauh mana tu karya2 lokal mo dihargai??
ada dua pilihan for berkarya..
mo cari popularitas plus materi
ato
salurkan idealisme mar tetap mendambakan popularitas
nda usa munafik, pasti tujuan utama berkarya itu adalah jadi top trus banya doi!
itu opsi paling ideal for pekerja sastra dg seniman.
jadi for apa sok idealis mar ujung2nya pope..roko minta pa tamang..dsb
karya yg banya org suka itu stenga mati ja tebak..
mar nda mo lari jao dari seks ato cinta.
samua kembali pa para penulis..

for Manado trg musti bangga skarang so banya pendekar2 sastra.
mulai dari angkatan trilogi puisi minahasa,wowor,kalalo,sondey sampe yg eksentrik sama dg witho lahope ato wowene huruwaty...
yg pasti sastra manado so lebe berwarna dan bergairah!!
qta pun jadi lebe terangsang for se kaluar karya yg woouuww...

at least,keabadian so lebe gampang mo raih !!


lanjut di next posting jo...
masi suka mo ba ketik mar ni pengaruh FO mulai dapa rasa!

Pa, Happy Birthday !

pa,jang menyerah neh
nda usa inga tu dulu

pa,smangat neh
nda perlu ragu

pa,jang lupa neh
slalu waspada

pa,berjuang neh
slalu berdoa

pa...slamat harijadi

luvU

Tahun 2009 ini qta pe harijadi daparasa spesial ! Berbagai cobaan bkg ni taon jadi lebe berkesan..memang kalo mo iko qta pe kemampuan,jujur qta nda sanggup! Apa yg qta alami sungguh di luar prakiraan..depe gambaran,pas hut thn lalu pas tgl cantik 20-08-2008,qta lagi di puncak karir,semuanya melimpah! Kontras skali dg ni taon..pokoknya kalo dari segi karir,skrg so musti start ulang dari awal..depe ibarat dari rockstar bale ulang ka pengamen..mar qta senang karna deng samua penderitaan yg qta alami jadi modal yg tak ternilai for qta pe karya2! Qta jd lebe mangarti arti keterpurukan..dan dari kehancuran kan hadir karya yg dahsyat! Trus yg bkg harijadi taon ini jd lebe berkesan,qta so jd papa..puji syukur for GOD,qta pe anak cowo sesuai keinginan..skrg Noel Oscar Elvis Lumenta (N.O.E.L) somo 9 bln,dia jadi anugrah for qta!tiap hari dia lebe lucu..for qta ,noel adalah kado terindah hut ni taon! Dan peran istri tercinta leh sangat berarti for qta..dia yg slalu se smangat,bkg qta tenang dg kuat! Qta le bersyukur dapa orangtua yg slalu perhatian..selain itu,qta pe tamang2 bae juga bkg qta terhibur ! Makase samua..
Dan for Jesus Christ,qta bersyukur utk nafas kehidupan dan kesehatan..
Happy birthday Everhard !!

Short Time

qta nimau long time
nda mampu !
kalo kwa om pe model sama deng roy marten
mungkin qta se diskon
mar ini nintau mahkluk darimana
mungkin malaikat da bad mood waktu da proses pa om
bae le om banya doi
mar tetap qta nimau long time
sdangkan cuma nda lama qta rasa2 mo tutu om pe muka deng majalah
sorry om
memang qta butuh doi
mar qta le punya klasifikasi
qta musti selektif
nda sambarang laki2 bole plo pa qta spanjang malam
jadi bayar jo jang qta somo telpon pa om pe bini !!

Sail Bunaken for Lusy

Bae le pemerenta banya beking acara
jadi banya order

Bae le apotik masi buka
jadi masi riki

Bae le hotel blum vol
jadi blum mo pulang

Bae le dia sadiki gaga
jadi sadiki smangat

Bae le da minum chivas
jadi da tastel bagus

Bae le tau bahasa
jadi tau depe mau

Bae le ada Sail Bunaken
jadi ada dollar

Facebook

biar nda kanal asal dapa lia gaga
langsung add...

biar nda gaga mar dapa lia tali bh
langsung add...

biar nda butul asal artis pe nama
langsung add...

biar so lama mar namanya mantan
tetap add...

biar so tau dia ada par
tetap add...

biar so lat deng doi so abis
tetap online...

17tahun.com

pe lama leh ni loading
riki so rasa kincing

kabur leh depe gambar
riki so kase basar

bole jo ni parampuang
riki so batalanjang

goyang jo sandiri
riki so badiri

Manguni Trip

M A N G U N I T R I P

Smokol ubi di kinilow

Makang siang di Tinoor

Malam dapa makang gratis

Ada orang kaweng di Sonder

Amper pagi mabo di Leilem

Lusa

So di I C U Bethesda !

Dara

D A R A

Malaikat turun ke Bumi

Segerombolan datang ke Tomohon

Sekompi ke Tondano

Sebatalyon ke Manado

Tugas istimewa menanti

Melindungi karya surga !!

Kecantikan

Kemolekan

Kepolosan

Dara Minahasa

Kini . . . Malaikat Letih

Sang Dara melarikan diri

Tanah Lumimuut ditinggal

Sorong jadi saksi

Karya Surga dikomersilkan

Cingke

C I N G K E

Cingke nae harga

Lonte tatawa cina

Cingke lagi panen

Tole mabo sadap

Cingke dua karong

Keke bli kalong

Cingke taambor-ambor

Nyong cuci tangan deng Bir

Cingke tafiaro-fiaro

Broer pe kolestrol nae

Cingke abis . . .

Tole deng Keke bahaga

Koperasi bahura !!

my book cover (new edition)

Idiot Blues

Nimbole lia orang diatas
salalu bakurebe mo cungkel
nimbole lia orang tabae
salalu mo cari depe busu

Rambu ada bagus2
kage so ja strik
tau2 kwa kribo
mo stel kase lurus
bisae tau !!

So tapilih
so tadudu di senayan
masi maniso leh
mo bacalon di pilkada
golojo kang !?
kase kek pa orang laeng

Papa mama bakobong
stenga mati bapacol
cari doi for anak pe kuliah
eh, ni tuama stel bos2
nokia N81, baju spyderbilt
bakaca kwa !!
skali tole tetap tole

Ada piara alus dari kacili
maso2 skola minggu
sampe basar rajin ka greja
kage so brangkat ka sorong
pulang kamari bawa ole2
doi plus HIV

tanggal tua kwa doi so tiras
masi bapaksa mo action
makang pizza di mall
supaya orang lia kata
lida gunung mo stel rasa spagheti

tau2 so nda mampu
gengsi mo bilang
dorang tumpah trus
masi layani
depe laste
got jadi saksi
kiapa,ngana pe got??

Kata Hati Laki-laki Bisae

Kata Hati Seorang Bisae

cewe itu gaga
kalu dia
suka pa Qta

Welcome to my world !

Manusia mo abadi kalu dia ada karya! Biar so di kubur mar kalu ada bkg karya maka dia akan tetap ada di grame,perpus dg di internet..
Zaman skrg so berubah..kalu dulu top skali tu mesin ketik,trus komputer kong skarang laptop..yg lebe praktis,bole ba online dari hp!
Deng kecanggihan ini,mo lebe banya muncul karya2 yg spektakuler..semoga!

cat:
da test ba posting dari hp!

Wenie

Ini Qta pe Kisah
Qta pe nama Wenie.R,tamang2 ja pangge Cuma Wen. Ni nama pe arti,Wellem deng Nietje pe gabungan. Wellem.R itu Qta pe papa sdangkan Nietje.S itu Qta pe mama. Orang2 slalu ja hormat ato ja paksa tersenyum kalu bakudapa deng papa. Mar yang lebe dorang hormat tantu Qta pe opa,Ventje.R. Bagimana dorang nda mo hormat,dia kan Gubernur propinsi M. Jadi Qta ini cucu gubernur. Bukang Qta pe mau mo jadi bagini,soalnya yang Qta tau dulu nyanda bagini.

Sampe Qta SMA,Opa cuma dosen,deng ja aktif di partai politik. Torang le pe kluarga depe hidop biasa2. Papa ja badola,mama tre Cuma bajalang kaki kalu mo pi kerja,maklum depe kantor Cuma dekat dari rumah. Hidop mulai brubah waktu opa tapilih jadi anggota DPR.

Qta masi inga bagimana papa pe sibuk jadi opa pe tim sukses. Kasana kamari cari pendukung. Sayang Qta pe umur blum cukup for bapili. Kalu so cukup,paling Qta le jadi opa pe tim sukses di Qta pe skolah. Sapa nyanda suka anggota keluarga mo jadi anggota DPR,baru mo lia depe gaji so beking malele gidi2. Akhirnya kerja tim sukses nda sia2,opa tumbus DPR. Torang kluarga bauni sama2 di TV,pas depe pelantikan. Soalnya Cuma oma tu bole pigi gedung DPR.

Baru dua minggu jadi anggota,Qta pe opa so ja kase spleter pa Qta. Dia bilang ada dapa doi operasional ketua fraksi,jadi berbage dulu deng cucu2. Qta tantu sanang deng kondisi2 bagini. Sekitar tiga bulan kemudian, opa so jadi ketua DPR. Kiapa bagitu?soalnya ketua yang dulu ,meninggal dunia akibat serangan jantung. Opa yang notabene ketua fraksi yang juga cukup vokal kalu pas sidang2 langsung tapilih for mo ganti. Tentu ini prestasi yang depe imbas,gaji le iko nae,cucu2 tatawa cina. Qta skarang lebe bangga pa Opa,depe usaha dari dulu akhirnya babuah.

Torang le pe hidop mulai tabae. Papa langsung ba kredit oto,nanti opa bayar kata depe bulanan. Qta le yang dulu Cuma bole lia2 tu baju Spyderbilt ato Billabong,skarang so bole rasa bagimana tu kaos. Pokoknya hidop ini so berubah. Hidop lebe berubah waktu pemilihan gubernur. Opa sebagai Ketua DPR,punya pengaruh besar for bapilih gubernur. Pokoknya brapa kali Qta lia pa opa pe rumah ja datang orang2 top yang mo ba calon gub. Eh ternyata,opa le mo ba calon.

Dan yang Qta nda pernah sangka en duga, opa jadi gubernur. Ternyata keakraban selama 4 bulan di gedung yang sama beking ni anggota2 DPR lebe suka pilih dorang pe ketua deng wakil sandiri for jadi gubernur deng wagub. Padahal kalu mo pikir,opa nyanda banya babuang. Nya sama deng tu calon2 laeng,yang ja servis bagus2 pa anggota2 DPR.

Mar itu no yang namanya hidop. Orang nda pernah tau apa yang di Atas pe mau. Torang cukup jalani deng slalu bersyukur deng apa yang ada. Torang kluarga iko sanang pas opa tapili jadi gubernur. Otomatis torang pe nama kluarga langsung ta angka. Bayangkan,lima taong ke depan opa jadi orang no 1 di propinsi. Brarti torang pe kluarga le turut jadi kluarga no 1.

Yang nda ena setelah opa jadi gub,Qta so nda bebas bergaul. Biar bagimana Qta musti jaga nama bae kluarga. Jadi so nda mungkin Qta mo nongkrong di leput,manyanyi deng bagate kasegaran. Skarang Qta so di level Jack Daniels. Mar memang itu yang Qta rasa. Opa jadi gubernur,cucu le jadi public figure. Tiap Qta ka skolah,tu mata2 slalu ja perhatikan pa Qta. Depe lucu tu guru2 skarang so brubah pa Qta. Kalu biasa matematika 6, skarang so jadi 8.

***
Nya sulit for Qta mo cari maitua. Soalnya setelah lima bulan jadi gub,opa batanya pa Qta sebagai cucu paling tua,
”apa ngana pe mau,Wen??”
yang ada pa Qta pe otak saat itu Cuma oto. So lama Qta ja menghayal, bawa oto sandiri ka skolah. Dan akhirnya,satu unit Daihatsu Feroza jadi Qta pe milik. Deng ini oto,Qta banya carita. Soalnya banya tu parampuang2 matre badekat pa Qta. Biar le Qta nda bawa oto,yang namanya cucu gub,cewe2 tetap suka badekat,apalagi so ada oto sandiri. Mulai dari gaga sampe yang biasa2 sok dekat deng Qta.

Yang aneh,kiapa baru skarang ngoni suka bergaul deng Qta? Waktu Qta masi orang biasa,ngoni ja bajao soalnya lengkali Qta maso klas so bobou minuman. Memang dulu Qta akrab deng tamang2 yang orang pe istilah jap2. Maklum orang kampung,jadi pengaruh di skolah. Supaya dorang nda mo jajah,mau tak mau Qta musti akrab deng dorang. Akhirnya Qta jadi sering mabo. Mar yang Qta sanang,ni tamang2 ini,dorang itu setia kawan. Tiap kali Qta ada masalah, salalu dorang bantu. Perna satu kali,Qta lari dari rumah lantaran ada baku strekel deng sebe. Tamang2 ini yang kase nasehat,nda guna mo lari,lebe bae pulang kong bacirita bae2.

Qta bersyukur punya tamang2 bagini. Biar nakal2,mar dorang itu sebenarnya bae. Jadi pas Qta so jadi cucu gub, dorang nda perlu mo cari muka mo badekat pa Qta,soalnya torang itu so akrab. Dari Qta yang nda ada apa2 sampe skarang. Kalu dulu torang ja minum captikus,skali2 kalu ada doi,kasegaran. Skarang Qta ja traktir pa dorang minum dry gin,ato kalo ada doi banya Qta bli akang Jack Daniels. Yang Qta tatawa kalu ja lia dorang minum. Lantaran lida cap tikus,jadi ni minuman2 mahal maso tre2,padahal depe kadar alkohol tinggi. Akhirnya dorang pun mabo berat.
Sampe Qta lulus SMA,dorang tetap jadi Qta pe tamang bae. Kenangan2 pas ba cao sama2,basambunyi dari guru slalu akan tasimpang dalam memori. Qta sebenarnya opa ada suru kase lanjut studi di luar. Mo kulia di ibukota ato luar negri,dia sanggup mo biaya. Qta pikir2 ,Qta masi suka tinggal disini. Masi mo nikmati posisi sbagai cucu gub.
Jadi Qta kuliah disini. Sama deng kondisi SMA,di kampus pun banya skali yang ja ba cari muka. Dorang pura2 bae di muka pa Qta lantaran Qta pe status. Coba kalu Qta Cuma mahasiswa biaasa?mar bagitu no ini realita. Qta pun harus jalani. Bagus tre banya orang ba bae2 pa Qta. Depe sadap, Qta gampang mo cari cewe. Tinggal mo pili komang.

Mar Cuma satu yang beking Qta jatuh hati.Depe nama Gina. Ni cewe aktif di BKK,jadi dia itu anak rohani. Qta pikir nda mungkin dia mo manfaatkan Qta pe status. Laeng carita deng cewe laen yang rata2 matre. Jadi Qta langsung tertarik pa Gina.

Dan cinta pun tak bertepuk sebelah tangan. Qta deng dia akhirnya jadi. Setelah jadi,nda ada yang namanya bajalang ka 21 ato tampa2 laeng. Qta slalu dia pangge maso praise centre ato iko kkr.

Kondisi bagini terasa sulit for Qta. Dimana deng doi yang Qta punya mudah skali tagoda for mo ba foya2 di pub ato café. Apalagi Qta pe kebutuhan ato dorang bilang kecanduan akan alkohol termasuk tinggi. Qta nimbole kalu satu hari kong nda minum.

Begitupun dengan urusan musik,di oto Gina slalu pasng kaset GMB.Sydney ato Frangki Sihombing. Padahal Qta ini penggemar Marylin Manson yang nyata2 menghujat Tete Manis. Kalu Qta mo langsung pindah aliran,itu susah. Akhirnya lengkali Qta deng dia ja bakuambe lantaran Qta so bobou minuman. Qta perna bapikir,lebe bae jadi deng cewe yang Qta bole ator,supaya Qta bebas. Mar Qta pe hati so terlanjur sayang pa Gina. Dan mungkin kalu torang ta trus kaweng kong dapa anak.tu kacili pe nama mungkin Wegi,gabungan Wenie dan Gina. Mar itu masi jao,Qta masi suka nikmati ini masa muda. Dia pun masi suka kase klar tu kulia kong lebe serius di pelayanan. Qta deng dia tetap trus batona. Dan Qta pun trus minum for penuhi Qta pe kebutuhan alkohol.





* * *
Keadaan jadi mulai rumit pas somo pemilu. Nintau kyapa papa le mo iko bacalon jadi anggota DPR. yang lebe soe,oma le iko2 bacalon. Qta pikir kalu papa masi wajar mar oma?itu so nda maso akal. Biar le torang pe kluarga lagi dia atas mar jang talalu vulgar kwa. Cukup jo tu opa ja ambe dari proyek2 yang diantaranya fiktif. Blum cukup le tu gaji gubernur amper ampa taong ini.? Nintau sapa tu ada kase2 panas spaya oma ba calon. Mar Qta kasiang Cuma cucu jadi nimbole beking apa2. Yang Qta nimau kwa orang2 somo bilang torang ini kluarga rakus!! memang itu no depe imbas pas rakyat tau papa deng oma bacalon. Dorang langsung bapikir lantaran opa pegang posisi jadi depe bini deng anak gampang dapa doi for kampanye. Sebenarnya kalu torang ini nda beking hal2 sama deng ini,mungkin rakyat mo hormat trus. Soalnya slama ampa taong ini, propinsi ada aman tentram. Beda deng daerah2 laeng yang banya konflik. Opa berhasil kase erat tu hubungan antar umat beragama. Di sisi ekonomi,banya investor yang datang karna dorang lia ini daerah aman. So itu Qta nda abis pikir kiapa papa deng oma mo beking rusak ni opa pe prestasi. Qta pastiu kalu opa pe perjuangan jadi sia2 karna rakyat nilai depe kluarga yang golojo. Mar mo beking apa le,pemilu so berlalu., Papa deng oma mulus tapilih. skarang rakyat so ilang simpati pa opa. Kiapa opa cuma kase biar ini samua..?
Yah,kalu so bagini ,pasti opa so nyanda mo tapilih ulang di periode brikut. Jadi Qta bilang pa opa,manfaatkan bae2 jo ini satu taong trakhir.

Qta langsung tagi tu opa pe janji mo kase kulia di luar negri. Qta so pastiu tinggal disini,so nda tahan orang ja bilang keluarga golojo...

Vivid

Vivid
Siang ini pe panas dapa rasa menyengat skali pa Qta pe badan. Tu suar nda brenti2 mengalir pa Qta pe kous.Bae leh da pake kous warna itam,jadi nda kantara kalu tu ketek so basah!! Mar komang biar so mandi suar, bukang berarti ni badan jadi bobou. Be’da purol plus wangi deodoran jadi resep yang mujarab for ni badan.

Biar so rasa panas,kaki ini seakan nimau brenti for trus mo bajalang. Ada sesuatu yang beking tubuh ini nda mo rasa lalah, mo trus bergerak. Dari oto,so bagambar bagus..apalagi tadi satu oto deng cewe gaga. Mahasiswa ekonomi stou dorang. Panjang rambut beking Qta lebe tamba bagambar..enak kalo mo tarek2!!

So itu ni badan jadi nda rasa tu panas menyengat. Soalnya selama perjalanan dari kampus sampe blakang jumbo, ni mata slalu menatap dua mahkluk cantik walau sambunyi2! Mungkin lantaran dorang tau Qta ja haga,lebe beking diri dorang..apalagi Cuma torang tiga di dalam mikro ,jadi ampa kalo hitung deng sopir.Qta dudu di tampa dudu sandiri, sdangkan dong dua dudu di blakang sopir. Sejak awal Qta so tarukira pa dorang dua di jalan sebelum dong nae ni mikro. t-shirt plus jeans ketat beking mata jadi betah for lama2 bahaga. Nintau kyapa, hari ini dapa rasa mem- bosankan. Banya tugas yang dosen kase jadi salah satu faktor beking Qta malas balama-lama di kampus.

Alasan laeng capat pulang karna so nda ada pemandangan bagus di fakultas. Yang tasisa Cuma tuama2 yang masi siang so niat mo mengisi tubuh deng cairan yang beking pusing,beking muntah deng beking saki kapala. So jadi sebuah ritual bagi sekelompok mahasiswa disini for bakumpul pas klar kuliah. Lengkali tre biar masi ada kulia,dorang so bakumpul. Kalu so takumpul ,aksi spontan kase kaluar dompet jadi hal yang lumrah. Kalu Cuma mo cari dua par,paling nda lama. Yang depe grap,paling banya dorang ja simpang doi kalu masi pertama2. Mar kalo so tasadap baminum apalagi so tagantong,nda usa tanya, tu doi ja kaluar sandiri. Nda peduli itu doi fotokopi,diktat atopun doi kost. Masalah doi bole mo cari kata..

Sebenarnya dorang ada pangge pa Qta for gabung ni siang. Mar tau kyapa Qta lagi malas mo kase biar ni bibir lama2 menyentuh glas aqua yang dipake bergilir,bibir demi bibir.. Lantaran nda ena, jadi dua kali jalur Qta masi dudu deng dorang. Bicara2 tentang masing2 pe kisah. Mulai dari momake dosen,bacirita bola sampe ke masalah yang klasik bagi laki-laki,tentang asmara...

Jadi rasa ganjil kalo cowo2 so bakumpul kong bacirita tentang cinta. Dorang pe istilah curhat..Kalu kwa cewe,dapa rasa biasa saat dorang bakarlota tentang dorang pe cowo. Mar kalu cowo?Jadi topik yang tergolong eksklusif kalo sementara baminum kong bacirita tentang manisnya cinta.

Jadi nda ena bicara soalnya nda samua yang bakumpul pernah merasakan cinta. Dari brapa yang sering bakubawa,ada dari torang yang nda ada maitua. Bahkan ada Qta pe tamang yang punya catatan rekor di kampus. Dia pernah tanya tiga cewe yang satu angkatan deng torang. Tiga2nya ditolak. Jadi topik yang bagus kalo so menjurus kasini. Soalnya rekor ini jadi bahan carita yang panjang.


Cukup dua kali jalur,Qta langsung ba- bilang mo pulang. Dorang mangarti pas lia Qta trima telpon dari rumah. Qta pun langsung pulang iko muka nimau om kantin lia,ada utang 2ribu for 1glas kopi plus 2batang surya. Sebenarnya ada doi mar masi malas mo bayar. Apalagi ada rencana mo babli.


Nintau mujur apa kong satu oto deng dua cewe gaga. Dorang dua turun di blakang telkom,sdangkan Qta trus menuju jumbo. Kontras skali ni pemandangan dari lia cewe gaga ka kumpulan orang2 yang lalu lalang di blakang jumbo. Mulai dari uti2 sampe orang2 gunung yang mo bablanja di 45.

Kaki ini trus melangkah menuju taman kesatuan bangsa. Karena so lama nda lia cabo ni badan tergoda for mo basingga di PS alias pasar senggol. Nda sadiki barang yang Qta dapa di tampa ini. Umumnya baju2 langka yang nda jual di toko2. Baju gambar musik yang dikirim dari jepang,hongkong ato korea deng tas2 mahal jadi incaran utama. Qta suka bli lantaran depe harga miring.

Tangan ini terasa lalah abis babongkar setumpuk baju yang menggunung disertai aroma baju cabo berbaur deng bobou suar dari penjual maupun pembeli. Kali ini pencarian berakhir dengan hasil nihil. Nda ada baju yang istimewa. Kalo pun ada masi mahal. Maklum,ini hari senin jadi dorang baru babongkar,otomatis harga masi mahal.
Langkah pun menuju muka presiden untuk mencari barang yang sudah menjadi kebutuhan wajib. Pilih-memilIh ,menyel- eksi gambar2 cover yang ada. Memang brapa kali Qta tatipu deng gambar di cover. Dapa lia gaga,mar serta putar di rumah,sondo!! Akhirnya setelah memilih,dua film dalam genggaman tangan siap untuk dibawa pulang.
Selembar uang W.R Supratman pun dike- luarkan. Setelah trima doi kase pulang,Qta pun langsung beranjak pergi.
Nda sabar rasanya mo lia depe isi. Pikiran ini jadi penasaran mo lia gaya apa yang ada dalam vcd ini. Mo telaah skaligus cari referensi. Cukup lama juga Qta cari mikro for pulang. Kebanyakan sopir nimau maso pa Qta p kompleks yang memang jauh dari jalur semestinya. Maklum,siang yang panas beking dorang malas mo baspekol bawa penumpang jaoh2.
Akhirnya Qta dapa oto,yang bukang kebetulan di dalam ada sosok mahkluk ciptaan Tuhan yang indah. Skali lagi dapa bahan gambar bagus.

Perjalanan jauh terasa amat singkat ketika duduk bersebelahan dengan gadis cantik ini. Qta tau depe rumah! So brapa kali satu oto deng dia. Mar baru skarang dudu bakusablah.

Masi suka mo nikmati kebersamaan ini,eh dia so turun. Ternyata dia mo basingga di minimarket. Nintau kyapa Qta ini biar so ada maitua alias pacar masi saja suka lia cewe laeng. Mungkin so depe hukum kalo seorang cowo suka lia cewe gaga. Mar mo beking apa kwa tu mata diciptakan kalo bukang for balia. Jadi Qta pikir wajar2 saja kalo Qta pe mata jadi liar tiap kali lia cewe gaga.


. . .


Banya kali Qta dapa cubit lantaran iko mata pas lia cewe gaga,padahal Qta ada bajalang deng maitua. Dia ja veto kalo lia Qta talalu lama ja perhatikan cewe laen. Mar sapa suru kwa dorang pe baju seksi2 yang mengundang torang,cowo2 for mo nikmati.

Mungkin lantaran nimau Qta berpaling, tiap kali torang dua bajalan dia salalu suka bagandeng, seolah-olah ingin kase tunjung pa orang kalo Qta ini dia punya. Qta le anggap ini hal yang wajar. Apalagi Qta memang sayang pa dia. Yang Qta binci kalo dia so pake baju seksi. Qta nimau orang laeng mo bagambar pa Qta pe maitua. Yang Qta suka,Cuma Qta sandiri bole nikmati maitua pe keindahan.

Nda terasa, mikro so brenti di Qta pe muka lorong. Memang lengkali Qta pastiu deng posisi torang pe rumah. So stenga mati oto, jaoh le mo bajalang ka dalam lorong. Mau tak mau, kembali lagi kaki dilangkahkan satu demi satu menuju rumah tempat tinggal.
Lantaran panas terik, ni suar di baju tamba banya. Jadi pas sampe di rumah,Qta langsung bacuci kase fresh tu diri. Ni puru langsung babunyi,maklum dari tadi blum isi apa2. Kaki pun bergerak ke meja makan. Cek para cek, yang tersaji Qta pe makanan favorit,roa. Nda rekeng tiga,Qta langsung ambe piring for makan. Karna lapar,sampe dua kali tambah baru rasa kanyang. Enak!!
. . .

Biar so kanyang mar ni rasa penasaran mo lia tu vcd nada ilang. Jadi langsung saja Qta putar di kamar.Vivid production,ternyata Qta nda salah pilih. So jadi jaminan mutu,produk2 dari vivid. Qta pun langsung ambe posisi yang sadap for bauni. Janine, Steven Croix ,dll ..Oh,ternyata ni kaset keluaran vivid lama yang bagi Qta depe pemain so veteran2. Kan sekarang eranya Jena Jameson. Sedangkan Janine pe tamang satu angkatan Jill Kelly ,skarang so jadi produser.
Kali ini nda biasanya,ni film nda langsung2..ada depe jalan carita. Lumayan for tamba2 koleksi. Memang kalo mo hitong, ni perbendaharaan film jenis ini so tergolong banya. Sekitar dua dos spatu.Barat maupun asia!!

Tumben..kadang2 vivid kase kaluar produk sama deng ini. Penonton jadi penasaran,kapan dang depe adegan???Sudah,dorang so mulai..ni badan so gelisah,cari2 posisi bagus for nikmati.
Sementara asik bauni kage suasana langsung jadi sunyi senyap. Televisi mati,begitupun deng mesin vcd.

Yah,mati lampu..!!!

PLN rupa nintau Kalo Qta sementara asik. Padahal blum sampe depe adegan..
Ah,biar jo paling kwa nda lama. Mungkin Cuma ada pohon jatung. Mar masa di tenga hari bolong bagini. Mo bilang baangin,nyanda. Satu jam brlalu,blum manyala2 ni lampu.Kiapa kang? nda biasanya lama bagini.

Smentara di koi kage dapa dengar oto pemadam lewat. Qta kaluar kamar kong pi lia di luar. Eh, ternyata ada asap itam basar di awan. Qta tarukira ternyata nda talalu jao darisini. Qta pun tertarik for mo lia dari dekat tu kebakaran. Skitar dua lorong dari rumah depe jarak. Orang2 so bakumpul..

Oh,jadi ini tu beking mati lampu. Riki Janine blum sempat buka baju...

Om Antje pe ruma kote yg tabakar!

. . .

Tuama Oki

Pe lama leh mama mo pulang, napa ni puru so baminta jatah. Tantu kwa ada bakarlota dulu… maklum ni minggu, mace bebas ! Papa ada ka luar kota, dapa dinas luar. Tinggal Qta deng mama noh yang di rumah. Biasa kalu hari minggu bagini, jadwal rutin makang tinutuan. Mar karna papa nda ada, otomatis nda ada yang mo beking. Qta lengkali ja tahaga bingo tiap kali lia papa ja momasa. Dari segi skill, jelas papa jaoh di atas mama. Tinorangsak, RW, Brenebon, nasi goreng sampe tinutuan aid kipas. Mar kalu mama, beking matasapi jo, lengkali ja manta tengah. Beda katu, dulu kata papa itu anak kost, jadi hidop mandiri. Kalu mama, anak manja, samua2 oma ja ator. Mar biar papa lebe jago momasa, Qta tetap paling suka kalu mama ja beking akang susu. Mungkin lantaran somo lapang taong ja beking, jadi mama so tau depe takaran pas. Bagitu le deng papa, dia suka skali mama pe kopi manis. Mar bagitu katu noh, samua ada depe spesialisasi.
Somo jam sambilan, mama blum beking2 ni smokol. Terpaksa musti bagera sandiri. Mie instant jo, supaya gampang mo beking. Bae leh ni kompor gas so jadi. Makang dulu ah, baru mo mandi.

“ Bobi…..Bobi….!!!” dapa dengar suara anak2 bapangge.
“Kiapa ??” Qta basuara dari dapur.
“ Manjo maso skolah minggu, pa Angel tre….”
“ Pa Angel ?? Tunggu dang, Qta mo mandi dulu !! Maso jo dudu di dalam..”

Pas dengar mo beking pa Angel, Qta langsung semangat mo pigi. Kan Angel itu orang kaya. Jadi paling mo dapa makang enak. Waktu skola minggu lalu, torang dapa makan nasi goreng enak lantaran banya daging kong pake sosis. So dapa makang, pulang leh bawa camu2. Pokoknya tiap kali skolah minggu pa Angel, tu anak2 lengkap mo datang, kecuali satu orang, Cella. Kiapa dia nimau datang ?? Lantaran dorang dua itu musuh abadi. Salalu ni dua cewe mo bersaing. Mulai dari baju, calana sampe capatu. Dua2 katu dari kluarga kaya. Angel pe papa, anggota dewan. Ni Cella pe papa, kapala dinas PU. Jadi dong dua pe kluarga banya doi. So itu lengkali, mama ja bagara pa Qta, kalu mo cari cewe, cari jo diantara dua itu, supaya kata bole hidop enak. Hidop enak ?? Bagimana so tu hidop enak ? Qta rasa torang pe hidop skarang le so tergolong enak !! Papa so tadudu di tampa bagus. Biar Cuma kepala biro, mar tu gaji so lebe dari cukup for biayai keluarga. Depe sadap leh, torang tiap bulan nda bingo2 mo bli bras. Soalnya, oma deng opa di gunung rutin ja kirim bras tiap bulan. Rumah bagus, oto ada, fasilitas lengkap, komputer, dvd , trus plus playstation. Pokoknya menurut Qta, hidop ini so enak !! Mungkin mama pe maksud, kalu Qta dapa cewe gaga, nda perlu siksa2 mo karja. Ah, Qta masi malas mo pikir2 tu dia… Masi jao !!!

Klar mandi, pilih baju. Musti pake bagus2, sapa tau Angel jatuh hati. Ah, masi kacili, mana tau dia tentang cinta. Kalu Qta kwa, biar umur 8 taong mar ni pikiran so dewasa. For apa tu papa pe buku2 amper satu kamar. Mulai dari buku filsafat, sastra sampe yang cinta2 ada. Jadi tiap kali nya ada hambak, Qta cari buku for mo baca. itong2 for tamba pengetahuan. Depe hasil Qta so bole rasa, Rangking 1 trus dari klas 2. Salalu dapa 9 for IPS deng Bahasa Indonesia. Jadi kalu mo bicara cinta, tinggal mo cari referensi pa gibran ato shakespeare. Mo taklukan pa Angel, itu gampang !!! Yang beking Qta malas, Angel lebe tinggi dari Qta. Maklum, pertumbuhan cewe lebe capat pas anak2. Tunggu jo kalu Qta so lewat, pasti Qta mo jadi deng Angel.

Kameja biru deng jins trus kets putih. Nya lupa bawa Alkitab.


“ so pastiu batunggu ??” Qta tanya.
“ nyanda, kan torang dua ada main PS “ Tian yang jawab.
“ io Bob, sabantar abis skolah minggu main ulang neh. Penasaran Qta noh, dia kase kalah “ Glen basuara.
“ lombo kwa ngana, io sbantar tong tiga beking Cup !!! “ Qta bagara pa Glen.
“ blum tantu, biar le tuan rumah “ Tian balas bagara.

Asik bacarita, kage nda rasa so sampe pa Angel pe rumah. Dan butul yang Qta bilang, banya yang datang. Tumben, Icha maso skolah minggu, biasa dia paling malas, maklum ja bangun jam spuluh katu !!. Dia itu ada panyaki tidor, nanti tatutu mata pas jam2 tiga pagi. So itu dia ja bangun lat. Lantaran panyaki, depe mama deng papa kase skolah pa icha di skolah yang depe jam siang. Mar taheran, kiapa ni hari Icha bole bangun pagi ?? mo cari makang kang ?!? biar jo katu yang penting hadir. Biasa sekitar 10 anak yang rajin maso skolah minggu, mar ni hari yang datang ada 23 anak. Mar tetap, Cella nda datang. Masi baku musuh kote dorang dua. Masalah pertama kwa jadi pas acara pohon terang. Kan waktu itu, anak2 skolah minggu mo main drama, tentang adam & hawa. Kong Cella deng Angel, sama2 suka mo jadi Hawa. Akhirnya dorang dua mulai baku musuh. Waktu itu, Angel yang jadi Hawa. Mar pas pawai paskah, Cella yang jadi Maria. Pokoknya dorang dua ini baersaing trus. Kalu Angel pake nike, Cella paling pake Adidas. Angel, nokia 6600, Cella nimau kalah, SonyErricson K 700i. Nintau sampe kapan dorang dua mo bagini. Mar kalu mo pilih, Qta lebe suka ja lia pa Cella. Dia itu cewe gaga, taiko depe mama yang pernah jadi noni Sulut. Tiap kali lia pa Cella, nda mo pastiu. Angel le katu cewe gaga, mar kwa kalah di gigi. Lantaran banya makan coklat, Angel pe gigi le jadi coklat kong lobang2. Mar kalu dia senyum tutu mulu, dapa lia sama deng putri. Apalagi kalu lia pa dia di dalam dorang pe oto BMW…bersinar !!!

Ibadah ni minggu, ka Nia yang pimpin. Anak2 dudu sopan mendengarkan pas ka Nia bacarita tentang perumpamaan anak yang hilang. Nya rasa, ibadah so klar. Anak2 pun so nya sabar mo lia menu apa ni hari. Yang baharap mo smokol, mungkin kecewa. Mar sebenarnya ini termasuk mewah. Bagimana nya mewah, tiap anak dapa satu dos dolphin donuts. Hitung jo brapa tu Angel pe mama ada kaluar doi. Kalu satu dos 10ribu, kali 23 brarti 230 ribu. Mar for orang kaya sama deng dorang, itu kecil !! Abis rekreasi, anak2 so mulai babilang mo pulang. Mo suka pulang capat, mo bakuriki bauni detektif conan.

Torang tiga pun langsung pulang. Sesuai rencana, Glen deng Tian pi rumah ulang, mo bermain. Sampe di rumah, mama so tunggu kote.



“ ih, bawa kukis situ eh… minta dang !! “
“ napa for mama jo, Qta lagi malas makan yg manis2 “
“ Eh, ngoni so makang ? disitu ada nasi kuning, makang jo !! “ mama batanya
“ makase, mar so kanyang noh, ada makang 2 donat kwa noh “ Glen bajawab
“ io, Qta le kanyang makang ni donat…” Tian sambung
“ Ooh, jadi so kanyang dang ? Bob, ngana dang? “
“ io, Qta mo makang, mar mo baganti dulu….”

Sementara baganti, Glen deng Tian so mulai bermain. Permainan favorit, winning eleven, nya perna pastiu. Dorang dua main, Qta makang dulu, lapar. Harap2 mo makang di skolah minggu, nda jadi. Dua bungkus nasi kuning abis Qta makang. Abis itu Qta ambe tu donat, makanan penutup !!
Sekitar dua jam, torang tiga bermain. Dan yang jadi juara, gampang mo tebak..Tuan Rumah !! Wajar, hari2 katu bermain. Glen deng Tian pulang, Qta langsung ambe buku PR. Somo kumpul beso, musti beking skarang supaya nya lupa. Biar susa, tetap musti beking. Matematika… pelajaran paling stenga mati. Nintau kiapa, kalu pelajaran2 ilmu pasti, ni otak lambat loading ! Mar jang tanya kalu pengetahuan sosial deng sastra, Qta kipas !!
Mungkin dari skarang Qta so bole perkirakan Qta pe kelanjutan hidop. Insinyur, nya mungkin. Dokter, apalagi….Yang ada di hayalan, pegawai negri sama deng papa. Ato jadi pengacara sama deng Om Bob. Mar kwa, Qta pe cita2 dari dulu cuma1 :“INGIN JADI TERKENAL“.
So itu Qta skarang sementara blajar main gitar, sapa tau jadi musisi jago. Cipta lagu bagus, beking torang jadi top plus banya doi. Qta ja menghayal, kalu Qta kata sementara bagitar di atas panggung, kong penonton ja bataria Qta pe nama : Bobi…Bobi….Bobi….!!! Mar bagimana mo top kalu Cuma mo baforo di manado. Sedangkan dorang nova sondakh so deng tempo ba karir, tetap biasa2 jo. Kalu mo suka top, Qta musti kaluar daerah. sama deng Once.
Mar skarang te so lebe gampang mo jadi top, so ada kontes2 idol.
Itu kwa cita2… yang beking Qta pusing skarang ini PR mate, Qta nintau depe rumus !! Qta pe salah le kwa, pas enci ja jelaskan, Qta Cuma menghayal. Mar bagimana nda mo menghayal, tu enci pe face bagus kwa mo menghayal akang. Mujur apa stou, Qta skolah di tampa yang depe guru2, parampuang samua. Kong rata2 leh gaga2. Bagi anak2 yang blum tau tu keindahan parampuang mungkin nda barasa. Mar Qta ini yang anak kacili mar pikiran dewasa, sadar kalu Qta ini mujur skali dapa guru gaga2. Biar dorang marah2, tetap dapa lia dorang pe vasung. Sama no deng enci Rina, guru mate. Paling kalu Qta nda dapa jawab ni PR, dia mo cubit pa Qta. Ah, pasrah jo noh…asik te, enci mo cubit, brarti dia perhatian !!

PR blum klar Qta so manganto, bobo dulu ah…
Tu rumah dapa lia so tua. Depe dinding so nda pernah ja cat, so kremos. Nya talalu basar, kong depe aneh Cuma satu pintu !! Sebenarnya nda niat mo maso, mar kiapa stou ni kaki ja bagra trus menuju tu pintu. Abis buka tu pintu, kaluar tu asap2 harum dari dalam rumah. Sapa pe ruma so ini ?? Lantaran penasaran, Qta bajalang trus ka dalam sampe Qta lia ni benda aneh. Mesin besar, trus ada pintu. So baabu ni pintu, setelah Qta lap, dapa baca no tu tulisan : time machine .Ah, masa ini mesin waktu ?? Qta lebe tamba penasaran. Langsung Qta buka no tu pintu. Di dalam Qta bingo mo lia ni kabel2 deng depe alat2 laeng. Mar ada tombol deng layar, GO TO deng PLACE. Qta pun langsung bapikir mo kamana kang yang bagus? masa depan ato masa lalu. Kalu mo suka kaya, Qta pi masa depan kong bli koran olahraga yang muat hasil2 pertandingan. Bale ulang kong bataruh deng tamang. Ah, mar itu nda asik noh… Ka masa lalu jo, mar kapan kang yang bagus. Pikir2, kage muncul ide pigi ka masa saat Qta lahir, 16 Mei 1991. Langsung Qta tindis tu tanggal, di PLACE, Qta tulis RS Gunung Wenang dalam kurung kamar Bobi Rawung lahir. Rasa so lengkap tu tujuan, Qta langsung tindis GO !!
Pusing…taputar-putar….kage Qta sadar so ada di Ruma Saki. Qta ada di dalam kamar mandi. Pas kaluar, nda ada orang di ruangan. Sementara melahirkan stou di ruang bersalin. Qta langsung kaluar, cari ruang bersalin. Qta tanya pa suster, dia bilang skarang ada satu ibu yang sementara dalam proses bersalin. Qta pe dalam hati, Qta itu !! Dia tunjung akang tu jalan, Qta langsung menuju… Lantaran tu ruangan Cuma pake kaca, jadi bole dapa lia noh tu proses. Qta cari2 lia, mana papa pe tampang… mo lia bagimana dia pas masi muda. So lia2, mar nda ada noh.. biar jo, terlambat stou… Qta langsung alihkan mata ka tampa bersalin. Dapa lia tu suster2 deng dokter sementara sibuk. Qta penasaran mo lia mama pe muka pas kase kaluar pa Qta. Suka mo lia mar tu suster ja peleh. Kage dapa lia so ada bayi yang merah2 suster so plo. Itu Qta !!! Geli ja lia, masi merah kong mungil skali. Pas Qta lia pa mama… ada yang ganjil noh… masa mama pe muka bagitu !! perasaan itu bukang mama… kong sapa dang ??
hiii… Sartje pe muka itu !!! Haaaa…. iyo noh, itu Sartje….oma pe pembantu !!


haaaaaaaaaaaa……………..!!!!!!!!!!!!!

Tabangun ! Cuma mimpi kote…Qta sadar, ni baju so basa lantaran basuar. Kiapa Qta mimpi bagitu kang ? Mungkin lantaran Qta ja mara2 pa Sartje stou ? Memang kalu Qta pi pa Oma pe rumah, Qta ganu ja lia pa Sartje… dia ja sok perhatian. Lengkali, Qta nda minta, dia yang inisiatif beking akang susu. Tau2 Qta Cuma suka mama yang ja beking.

Akting bersama Teater Kromis

Cover Lusy edisi Perdana

Kisah Kasih Seorang Pecundang

Kisah Kasih Seorang Pecundang

“..Cin,sebenarnya so lama Qta mo suka bilang. Mar kiapa stou baru kali ini Qta brani mo ungkapkan. Mar kwa, biar le Qta nda bilang, paling ngana so tau. Dari Qta pe sikap yang dulu, yang memang kalu mo jujur,talalu vulgar!yang akhirnya beking Qta nda bisa raih ngana pe simpati. Dan ini yang beking Qta nimau mo ungkapkan saat itu,karna Qta tau pasti akan ada penolakan. Akhirnya Qta Cuma bole pendam ini perasaan. Dan Qta cukup sanang kalu ternyata torang dua pe hubungan nda jadi tajaoh semenjak Qta pe manuver. Memang di brapa saat, Qta jadi malo kalu mo bakudapa deng ngana. Mar Qta sanang kalu trnyata Qta masi bole dengar ngana pe suara biar Cuma di telpon. Biar Cuma brani di telpon,soalnya kalu mo bicara langsung,rasa bagimana stou??ngana pe pesona beking Qta jadi tabadiam tiap kali lia pa ngana, seakan-akan ni bibir jadi taslot. Qta cukup lama ada pendam ni perasaan. Dan skarang Qta pikir so pas depe waktu for mo ungkapkan. Ngana deng Qta so nda perlu malo tamang-tamang mo gara, kan torang dua so klar kuliah. Sama-sama so karja, Qta pikir torang dua so lebe dewasa. Dan ngana pasti so tau Qta pe orang bagimana. Jadi skarang Qta so nda ragu mo bilang kalu Qta ini suka pa ngana…!!!”

Kira-kira dua menit Teddy melamun di muka kaca. So brapa hari ini, dia ja latihan dalam kamar supaya lancar pas mo bakudapa deng Cindy. Memang sosok Cindy nda akan perna ilang dalam pikirannya Teddy. Semenjak pertama maso kuliah,tepatnya pas masa ospek, Teddy so tertarik pa Cindy.

Dan perjuangan Teddy for mo taklukan Cindy cukup menyolok. Depe imbas, samua tamang-tamang kampus jadi tau kalu Teddy itu ada perasaan pa Cindy. Dan ini yang bekingCindy jadi pastiu pa Teddy. Maklum, Cindy itu cewe pamalo. Dia nda suka kalu orang-orang ja gara. Dan hal ini sangat fatal for perjuangannya Teddy. Depe laste, Teddy pe usaha jadi sia-sia. Dan Teddy pun nimau bapaksa mo tanya, karna dia tau pasti mo dapa tolak. Akhirnya dorang dua jadi agak tajaoh alias bajarak. Situasi jadi serba salah. Teddy so patah semangat dan Cindy sendiri dapa lia nda talalu ambe pusing karna memang nda ada getaran yang dia rasa. Diukur dari face,memang Teddy bukang cowo fasung. Mar yang Cindy nintau, kalu Teddy itu butul-butul suka dan depe rasa suka itu bukan nafsu alias murni. Waktu pun bajalang trus. Nda rasa, dorang dua so klar kuliah. Teddy so jadi PNS,sementara Cindy so karja di bank. Yang beking sanang pa Teddy, pas masa-masa akhir kuliah, depe hubungan deng Cindy so nda jaoh lagi. Dorang dua so mulai bicara ulang. Teddy pun jadi sering batelpon pa Cindy, sekedar curhat ato bicara studi. Dan Cindy nda tako lagi mo bafrei karna Teddy so ada cewe. Mar sebenarnya, biar so ada cewe, Teddy pe hati masi bahara pa Cindy. Dia nya mo talupa tu Cindy pe bayang. Dia masi ja bahayal kalu dorang dua akhirnya batona.
Akhir-akhir ini, tekad Teddy so lebe bulat. Dia so putuskan mo tanya, dalam arti dia somo ungkapkan depe perasaan yang sesungguhnya,supaya nda mo tapendam lebe lama. Dia so nda pusing mo dapa trima atopun mo dapa tolak. Kan skarang so nda ada tu tamang-tamang yang mo baterek. Teddy pikir dia musti ungkapkan secepatnya supaya depe hati bole mo plong en lega karna so nda simpang-simpang tu depe perasaan.

Kala Teddy berapi-api dalam persiapan mo ungkapkan depe perasaan,di tempat lain tepatnya di Tendy Studio, Cindy sementara ba pas gaun rancangan om Chok.

* * * * *


Untuk Seorang C

namamu
kan slalu menghiasi
hati ini
gagal menaklukanmu
membuatku lebih penasaran
entah kapan
malaikat cinta kan mendengar
doaku ini
ku masih menyukaimu
jika saja kau mengerti aku
skali lagi,
jika saja kau memberikanku kesempatan…..

catatan : ini Teddy pe puisi for Cindy. Dia beking pas klar baku telpon deng Cindy.

Soe Babi !

Nintau sbantar mo pake baju apa? memang ini malam minggu, mar ni kali beda deng yang sebelumnya. Ni malam mo bauni konser slank!! Memang so lama Qta ada tunggu2 ni grup mo kamari. Konser2 trakhir depe band nya talalu istimewa. Masa tuhari Dygta deng Radja konser di Klabat? wajar katu kalu sadiki tu bauni, paling yg datang Cuma orang2 tuminting deng wonasa : )
Jadi pas dengar Slank mo datang, Qta so bilang dari jao2 hari pa Brian ( Qta pe cowo ) kalu Qta suka mo bauni. Bae leh Brian suka ja dengar Slank pe lagu2, beda deng Butje,Qta pe cowo dulu. Lantaran tinggal di gunung, depe selera musik le tradisional. Jang tanya makaruyen, aid kipas !!

Waktu KKN, Qta dapa penempatan di Amurang. Tiga bulan disana, otomatis banya yang badekat, salah satu Butje noh. Qta kwa pe niat Cuma iseng, cari kenang2an. Tambah le Butje pe face di atas rata2 plus bodi yang tabentuk gaga, maklum hari2 di kobong, bapacol. Biar katu Cuma bakobong, dia itu tamat sma, jadi dari segi intelektual, menunjang. Kalu mo bicara sadiki nyambung, beda deng depe tamang2 laeng, yang rata2 pata pinsil. Dua minggu depe pendekatan, pas dia tanya Qta nda jawab. Qta bilang jalani jo dulu, kalu memang cocok brarti Qta deng dia bole mo jadi noh. Depe sadap ada paitua di posko, logistik lancar!! Amper tiap hari dia bawa akang buah2. Pas waktu itu ada musim rambutan. Depe sadap laeng, tiap hari makang enak. Kan Butje pe kluarga ada talaga deng ba piara boke, otomatis ikan mas deng tinorangsak jadi menu andalan.

Tiga bulan Qta deng dia jalin hubungan. Yang beking Qta tatawa, dia itu cowo pamalo. Kalu Qta badekat, depe pongo2 ja merah. Sedangkan badekat dia so gugup, apalagi mo harap tu hal2 laeng. Pegang tangan pun jarang. Mar hubungan bagini beking Qta nyaman, beda deng cowo2 kota yang maniso! Batona sama deng ini beking Qta tainga tu dulu2, sama deng smp2, batona malo2. Sayang KKN Cuma tiga bulan, jadi ni hubungan Cuma tiga bulan leh. Pas perpisahan, Butje antar pa Qta sampe terminal. Supaya terkesan romantis, Qta sun katu noh pa dia. Biar Cuma di pipi, mar itu jadi Qta pe tanda makase so jaga2 pa Qta ni tiga bulan ini. Butje pun tinggal jadi kenangan.

Bicara cowo, Butje itu mahkluk ke 7 yang jalin hubungan deng Qta. Jadi Brian cowo ke 8 yang jadi deng Qta. Tepatnya cowo ke 6 yang tembak pa Qta, soalnya ada 2 cowo, Qta yang tembak: )
Brian itu Qta pe ade tingkat. Dekat deng Qta lantaran sama2 pengurus senat.
Sama2 suka mie cakalang deng minum teh botol. So lima bulan Qta jadi deng dia. Jadi, ini malam minggu yang ke 21 Qta mo bajalang deng dia. Ni kali torang dua mo bauni konser slank. Rencana mo pake kets adidas nda jadi, Qta pe ade ada pake kote, dia so kaluar lebe dulu. Mo pake hak nya mungkin, yah terpaksa pake converse andalan. Sebenarnya sayang kwa mo pake ni spatu, soalnya baru bli. Biar jo, daripada Cuma mo pake swalow, kage bangka2 ini kaki dorang mo injang2. Spatu sudah, kaos oblong deng clana tinggal mo pilih. Kalu samua sudah, tinggal mo mandi trus tunggu Brian batelpon.

Jarum jam so di angka 7, Brian so di muka pintu. Abis ba bilang pa sebe deng ajus, torang dua langsung pigi. Soalnya so lat, mo bakurameji cari tampa gaga. Ni konser laeng deng yang dulu2, depe tiket maso Cuma 10ribu, tergolong murah!! Kira2 stenga jam perjalanan, torang dua pun sampe di klabat. Dan tiket yang murah beking ni slankers tatawa cina. Depe imbas, klabat jadi sesaa. Mar ini katu baru bilang konser, penonton banya beking depe suasana jadi asik. Brian deng Qta terpaksa bakuruju for mo cari tampa dimuka. Mo cari tampa bagus, napa Brian ada bawa tustel. Akhirnya setelah berjuang basoso di kerumunan, torang dua tumbus di paling muka. Lumayan, biar depe resiko ni toto ja tatasontong pa orang2. Nda apa2, Cuma tasontong kwa.

So fugado ni badan, kaka deng depe tamang2 blum muncul2 leh. So satu jam stou ada batunggu. Bae leh tu tiket ada tukar deng roko, jadi sadiki terhibur. Masalah roko, Qta ini termasuk pemadat. Minimal 5 batang tiap hari. Mo bilang apa leh, sdangkan kwa Qta pe ajus pemadat. lengkali tre torang dua batarek sama2 kalu sebe nda ada. Ajus bilang baroko nda apa2, yang penting jang pernah sontong tu narkoba. Yah, sdangkan ajus kase izin, otomatis paitua le musti kase. Bae leh Brian mangarti. Dan memang dia itu suka pa Qta apa adanya. Qta baroko, diapun iko baroko. Somo stenga bungkus ni roko, Slank blum muncul2. Ada baapa stou dorang?
Memang konser musik itu asik!! disini Qta bole cuci mata sepuasnya. Ada ribu tu cowo disini. Ngana haga kiri, haga kanan, haga blakang..cowo!! Depe jenis leh ada banya. Ada yang junkies, kurus pake jins kaki kuda. Ada leh yang funky, rambu pirang calana gombrang. Mar ada leh yang bakumis, pake kameja. Memang katu Slank pe penggemar itu variasi. Ada yang angkatan “Maafkan”, angkatan ”Kamu Harus Cepat Pulang, angkatan “Balikin” sampe yang paling baru angkatan “Ku Tak Bisa”. Samua takumpul disini for mo bauni pa kaka, bim2, abdhee, ridho deng ivan.

Ni mata nda mo tenang ja lia tu tampang2 yang menarik. Mar jang kira Cuma Qta yang cuci mata, paling leh Brian ja bagambar tu cewe2. Memang depe jumlah nda sebanyak cowo, mar biar kalah kuantitas, cewe2 yg datang depe kualitas beking tu cowo2 malele ewe. Lantaran stou tau mo fugado, tu cewe2 banya yang Cuma pake satu tali. Otomatis Brian pe mata leh ja kasana kamari. Biar jo katu, masa Cuma Qta yang lia cowo gaga.

Biar le banya cowo gaga, mar ni bitis so kram ada batunggu. So bareis stou? Talalu beking diri komang ni Slank, masa so satu jam stenga dorang bking batunggu. Sementara pastiu2 lantarang fugado batunggu, kage lampu2 dorang kase mati. Penonton langsung bahura. kan ini depe tanda kalu konser somo mulai. Memang butul, intro “I miss u, but I hate u” so dapa dengar..penonton pun langsung histeris waktu Kaka mulai manyanyi. Koor plus lompatan massal jadi hal biasa, maklum samua Slank pe lagu so familiar.

Dua puluh lagu stou dorang so bawa, nya rasa so jam stenga seblas. Biar le masi suka mar inga pulang noh. Mo susah oto kalu mo tunggu konser klar. Bayangkan jo tu 5000 orang badola oto sama2. Jadi Qta deng Brian so pulang biar blum klar. Bae le langsung dapa oto….
Pas mo bayar, Qta kage tu dompet so nda ada. Memang ada bakuator, Brian bli tiket konser, Qta bayar doi oto. Mar mo bayar bagimana le, tu dompet so nda ada…..

Pe lubalubangpuki leh...sudah jo tu doi, mar tu KTP , ATM...deng tu 8 pas foto !!?!?!...

Lubuk Hati

Lubuk Hati

qta suka pa ngana apa adanya
qta paling suka ja lia ngana pe senyum

qta tetap suka biar ngana larang qta baminum
qta masi tetap suka biar ngana suru qta brenti baroko

qta makin suka pas torang dua maso greja sama2
qta jadi suka skali waktu ngana se inga trus berdoa


qta akan slalu suka pa ngana …

LUBANGP**I DALAM HATI

LUBANGP**I DALAM HATI

kiapa kong sampe persoalkan qta p masa lalu ?
itu kan carita dulu…kiapa kong musti mo ungkit2 ?
qta ini cuma manusia biasa, yang punya catatan kelam…
nda ada yang bole qta beking !
qta nimbole mo rubah masa lalu…
yang lalu so terjadi !!
skarang qta mo tatap masa depan…
nintau kalu ngana bole trima qta pe diri
apa adanya ….
qta pun nimbole paksa pa ngana
kalo memang ngana nimau trima qta pe lalu2
brarti ngana nda mangarti pa qta
qta suka mo buka lembaran baru
yang cerah…
ceria…

deng ngana !!!

Kata Hati

Kata Hati

Salah satu karya surga telah turun di hadapanku
Seakan-akan memenuhi benak ini
Entah apa yang membuat diri ini berani
mengambil resiko..

melepaskan ikatan hanya untuk menantang sebuah ketidakpastian

sulit..
rumit..
pahit !!

namun,
seseorang harus selalu sabar menanti kemenangannya

karya surga itu pun
kini telah bersamaku..

KUDAC**I DALAM HATI

KUDAC**I DALAM HATI

biar le somo 2 taong, ni hati so terlanjur beku…
depe aer mata so nda mempan
Qta so nda mo luluh!
depe carita so laeng..so ada yang laeng!!

mungkin Qta ini memang egois..
mar Qta ini cuma laki2 biasa

memang nya mo bagini kalu dia itu mangarti pa Qta
dekat deng tamang2
ato nda talalu posesif

mungkin Qta mo suka bertahan
biar tu perbedaan bapeleh

di sudut hati yang kacili, ada babise :
sayang..

di sudut yang laeng :
baru sayang, blum cinta !!

Anti Anus

ANTI ANUS, ANJ**G !
(AAA!)


Mo lobang gua !!
Mo lorong kacili !!
Mo terminal oto !!
Mo blum da jalang ?!

Rimbas…


Raja singa
HIV
Garuxxx
Kincing nanah

Stau…


Tanta
Youngen
ABG
Ladies
Mahasiswi
Lonte
Tambio
Tamang pe maitua
Enci
Senior
Boss
Cewe di mikro
Tukang ba uru
SPG
Ade tingkat
Chayank2

Yang penting HAWA !!

BUKANG LOBANG PANTA !!!

MANISO MO KALUAR

MANISO MO KALUAR


Eeehh…

Laju jo jang qta somo ilang mau

Buka jo jang tunggu qta paksa

Goyang jo nya usa malo-malo

Simpang jo nya perlu pake tu dia


Plang jo
So sadap
Sadia jo
So di ujung


Ooooohh…


Seka jo
Somo bobou
Mandi jo
Somo abis jam

Aaahhh


Beso jo
Kurang so ?
Lengkali jo
Laa so ?!?!

Uuuuhh…

Lovers

“Beso mo jadi ?” Rey batanya pa Lisa.
“nintau leh, mudah2an papa kase..”
“yah, blum pasti dang? masa ngana tega kase biar Qta sandiri di malam minggu..” Rey stenga bapaksa.
“nanti lia jo kwa..Qta mo usahakan !!” Lisa balas jawab.

Suasana kampus ni hari memang pas for yang so atona. Ujang rinte2,langit somu2 plus udara dingin beking tu kemesraan lebe dapa rasa. Telapak2 tangan so bakudapa, bicara jadi syahdu. Yang baru jadi, paling masi malo2. Jang tanya pa yang so babunyi 2 taong, dorang so nintau malo !!
Ni cuaca bagini, bukang cuma cocok for yang atona. For mabokers alias para pecinta alkohol, ni suasana sadap skali for mo 3 par. Selain karna cuaca, alkohol jadi pelarian for yang nya ada par. Daripada malele ewe mo lia2 orang atona, lebe bae baku-spy deng botol!
Rey dulu termasuk kategori mabokers. Abis kulia langsung bercinta dengan miras. Carita jadi laeng pas Rey lia pa Lisa, mahasiswi baru. Biar bukang panitia Bismaba, Rey termasuk mahasiswa yang cukup dikenal lantaran depe prestasi musik. Dia so brapa kali dapa predikat the best gitaris. Jadi, biar pamabo dia ada kelebihan. Waktu dia lia pa Lisa, depe naluri laki2 langsung muncul. Entah karna Lisa pe gaga ato lantaran so siksa sandiri. Rey pun mulai pdkt, hasil akhir = pejuang diterima !!
(“ ,)
Kulia bukang rencana utama for Lisa. Dia sebenarnya mo suka jadi perawat. Mar depe papa mau Lisa jadi sarjana. Akhirnya demi kase sanang orangtua, Lisa pun kulia. Dari kacili, Lisa so hidop dalam lingkungan keluarga yang taat ibadah. Papa, syamas kolom..mama,kordinator kom ibu. Jadi, dari jaman skola minggu sampe ibadah pemuda, Lisa slalu berusaha hadir. Nda heran kalo skarang dia jadi Kordinator Remaja. Kalo mo lia, Lisa pe hidop itu nda sama deng depe tamang2 satu rang. Kalo yang laeng sibuk hafal Dewa ato Padi pe lagu, napa Lisa ada stenga mati hafal ayat2 Alkitab. Suka bantu orang beking dia ingin jadi perawat. Mar rupanya Tuhan punya rencana laeng. Lisa musti jadi sarjana, otomatis kehidupan kampus harus dilewati. Sampe lulus SMA, Lisa blum perna atona. Lantaran talalu alim, beking depe tamang2 cowo jadi tako mo badekat. Padahal di lubuk hati terdalam, Lisa le suka mo rasa bagimana tu atona?. So itu skarang dia so brani mo atona, kan so mahasiswa! Kalo dulu nintau bapake, skarang so musti brubah. Bae le Lisa ada tante gaul,Syul depe nama. Tante Syul yang kase ajar Lisa bagaya. Biar nda seksi, yang penting tu inner beauty so nampak. Nda percuma Syul ada ajar, Tiga cowo badekat pa Lisa. Belly, Ekhi deng Rey. Belly, panitia Bismaba.. Ekhi, anggota BKK sdangkan Rey, mahasiswa biasa, pamabo!! Nintau ada tainjang kodo, pake goraka ato setang ada tola... Lisa io pa Rey.
( “, )
“Nyong... so lomboan ini ??”
“napa gate dulu supaya lancar bicara !!”
Rey pe tamang2 nya brenti ja bagara.
“Biar jo, atik istirahat dulu.. napa tu dada so barasa!” Rey bela diri.

Konsekwensi yang musti Rey hadapi, brenti Minum deng Roko ! Sekilas tampak nya maso akal for seorang Rey. Mar itu harga yang harus Rey bayar demi kelanjutan depe hubungan deng Lisa. Depe nya sadap, mulai ada jarak deng tamang2 pamabo. Kalu tamang bae, pasti mangarti. Mar jangan tu tamang2 yang mangiri, nimbole lia orang sanang. Dorang suka Rey capat putus, supaya dorang ada tamang jomblo.

Lisa mo coba trima pa Rey pe diri apa adanya. Dia suka, Rey berubah !


“Qta larang ngana baroko deng baminum, lantaran Qta sayang !! “
( ni kalimat yang salalu ta bayang2 pa Rey pe otak)

45

Asap mikro plus bunyi spiker beking suasana 45 jadi talimburang. Sagala macam, samua ada di pasar 45, dari baju sampe cd, blanga deng sondo, vcd rohani sampe yang nya sensor… ada !! Ni tampa biar mo brapa kali ator, tetap talimburang. Riki pemerintah so pastiu mo tertibkan ni kios2 liar. Apalagi kalo so dekat lebaran ato natal… malimbuku tu umat di 45. Mar katu, ni pasar selain lengkap, murah leh. Otomatis orang2, terutama yang dari gunung lebe pili babli disini. Nya varek biar so ada mall, 45 still survive.

Matt, laki2 pranggang tukang jual dvd. Dari kacili dia so tinggal di 45, deng Papa plus satu orang ade. Matt nya kanal depe Mama. Depe Papa bilang, Mama so di surga. Matt pe kluarga asal inobonto. Mar, pe tau dunia, Matt so di Manado. Dorang tinggal di Texas, sabla Jumbo. Cuma sampe klas 4 SD, Matt so brenti skolah. Dia lebe pilih hidop di 45, yang penting so tau babaca deng baitong. Jadi, dari kacili Matt so rasa bagimana tu kerasnya hidop di bendar. Dia pernah bajual tas plastik, jual koran sampe terakhir bajual dvd. Depe Papa dari dulu nda pernah ganti usaha, jual mainan anak2. Deng ni profesi, dorang bole bertahan hidop.

“Sob, so ada tu SMA2 ?” laki2 gondrong batanya.
“Yah, blum sampe itu noh.. kalu yang surabaya so ada. Itu jo ?” Matt bale tanya.
“Mana2 jo, yang penting made in indonesia, so pastiu tu barat2!” laki2 gondrong dapa lia so nit manahan.

Farid Ahmad, panggilan Matt. Skarang jadi salah satu bandar dvd. Depe bos pe jaringan kuat, jadi banya skali dorang pe stok film. Mulai dari action, drama, komedi, semi sampe yang binatang2. Matt pe pelanggan beragam, dari anak skolah sampe opa2. Sejak dvd mulai top, Matt pe penghasilan jadi mantap. Maklum, di 45 baru sadiki yang bajual dvd. Depe bisae, pas banya doi, tu pengeluaran le jadi banya. Waktu nda banya doi, paling nanti malam minggu baru bagate. Mar skarang, amper tiap malam, Matt bakutamba cari miras. Memang jadi boros, mar jadi akrab deng tu preman2. Kalu biasa Matt ja kase japre 10ribu tiap hari, skarang so nyanda.

“Mas, ada dvd spongebob ngga?” cewe baju putih batanya.
“Oh, yang kartun.. itu dang di sabla kiri.” Matt kase tunjung.

Sunarti, cewe asal jawa yang jadi babysitter. Ati baru tiga bulan di Manado, jadi tu logat jawa masi kantal. Ati kerja pa orang tionghoa, yang punya toko mas di 45. Tu kluarga ada dua anak, tu satu so SD, sdangkan yang bungsu baru lima bulan. Lantaran sibuk mo jaga toko, jadi ni Ci deng Ko sewa babysitter. Ati pun datang ke Manado. So enam taong, Ati jadi babysitter. Jadi tu skill mengasuh bayi so banya. Mar baru kali ini, Ati kaluar pulau Jawa. So itu, dia stenga mati menyesuaikan deng makanan disini. Kalu di Jawa kan nya ada yang pidis2, beda deng disini.. rica sasaja! Lengkali dia musti cari makang di warteg. Mar lama2, Ati mulai betah di manado. Dia sanang lantaran orang2 manado, pambakusedu.. tatawa trus. Skarang Ati so suka makang tinutuan deng so tau apa tu pendo.

Love at the first sight .. ! Matt masi ta bayang2 tu cewe rambu panjang pake baju putih. Depe senyum pas batanya film, beking Matt nya tatidor. Skarang Matt slalu bapake rapi, sapa tau dia datang babli ulang. Matt manyasal nya riki berkenalan. Baru kali ini dia tertarik pa cewe, murni suka..bukang nafsu !! Biasa dia suka cewe karna ja lia tu bodi seksi. Mar skarang laeng, mo bilang seksi, baju suster itu tatutup.. mo bilang vasung, tu cewe nda talalu gaga, cuma manis. Selain manis, mungkin depe inner beauty yang beking Matt tertarik.

“Mas, spongebob seri terbaru ada nda?” Ati batanya.
“aa..da..” Matt bajawab kaku. Dia masi nya percaya, cewe yang dia suka so di muka pa dia.
“kalo dua, brapa yah?” Ati tanya harga.
“mmmh, gratis.. asal cewe mo suka kenalan !!” Matt tangisi-ngisi.
“bener nih? kan mas lagi dagang.. ngga takut rugi ?” Ati tanya ulang.
“ah..apa lah arti 2 dvd, yang penting bole kenalan deng ngana..” Matt trus berjuang.
“…mmmhh..” Ati masi bingo, antara geer, malo deng sanang mo dapa gratis.
“Qta pe nama Matt..” nya tunggu2 lama, Matt langsung kase tau depe judul.
“Ati…” kage ni cewe langsung pigi, nya riki ambe tu dvd.. mungkin dia malo.
“Hei… tunggu !!” Matt bingo, kiapa tu cewe so pigi.
Dusu..nyanda??
“Ton, jaga akang nya lama..” Matt babilang pa depe tamang.

Matt cari dusu pa Ati. Arjuna sementara mencari, dengan membawa dua keping dvd sebagai alasan. Nya susa mo cari cewe pake baju putih suster. Akhirnya Matt riki pa Ati.

“Cewe, tu dvd tatinggal…” Matt coba babilang.
“Biar aja, kan aku ngga bayar..” Ati pe muka merah malo.
“Qta kan so kase… ambe jo !!” Matt coba kase.
“mmmmhh..” lagi2 Ati bingo.
“sapa kote ngana pe nama??” Matt tanya ulang.

Cerita asmara memang paling sadap ja bahas. Akhirnya Matt kenalan deng Ati. Skarang Matt so tau Ati pe tampa tinggal plus no telpon. Nya percuma ja jual dvd. Film2 komedi romantis beking Matt banya referensi for mo kase sanang cewe pe hati. Matt pe pdkt sekitar dua bulan. Dorang dua pe tampa favorit, kalu nda bauni di president, paling minum kopi susu di jarod.

Skarang Ati so lebe suka makang tinutuan deng so tau apa tu cuki.

Keluh Kesah Seorang Adik

Keluh Kesah Seorang Adik
Rasa2 mo manangis kong mo babuang diri. sapa kwa nda mo saki hati kalu cowo beking bagini. So samua Qta kase,sampe tu mahkota yang dorang bilang paling berharga for parampuang Qta so relakan for dia. Pokoknya Qta pe samua dia so rasa. Eh,ternyata dia nimbole dipercaya. tadi jo pas jam istirahat Qta dapariki dia sementara bakusedu deng tu cewe depe tamang satu klas. tamang memang tamang mar masa bakusedu kong sampe ja baku plo? Memang bukang Cuma ini kali dia beking bagini pa Qta. Nintau mo bagimana Qta ini. Kalu kwa torang pe hubungan Cuma biasa2,mungkin Qta nda mo talalu saki hati. Mar ini,torang dua so sama deng laki bini yang amper tiap hari ja melakukan. Qta slalu nda tahang kalu dia so ja barayu. Pokoknya depe latabu slalu beking Qta luluh. Mar sebenarnya biar dia nda rayu, Qta le kwa suka mo rasa ena. Mar tetap biar dalam hati Qta so ingin,ja jual mahal sadiki,pura2 ja tolak padahal so suka.Sampe skarang Qta nda pernah mo lupa tu kejadian pertama kali. waktu itu torang dua ada bacao,kong pi pa tamang pe rumah yang kebetulan kosong depe orangtua ada kaluar kota. Jadi torang bebas dalam rumah. hari itu ada tiga par yang bacao sama2. Pertama torang momasa kong makang. Abis itu torang bauni film,smentara itu tu cowo2 mulai bagate. yang torang bauni film horror,tusuk jelangkung. Tu rumah,torang kunci kong tutu jendela deng horden supaya glap,sama deng di bioskop. Lantaran film horror jadi tu cewe2 baplo,biar tu cowo2 so bobou seho.pas film abis,kage dorang kase lanjut deng film BF. Qta so nda kage,soalnya dari kacili Qta pe sebe hobi ja bauni ni film kong langsung ja praktek pa ajus. Sebe ja putar ni film kalu lia Qta so tidor. Padahal lengkali,Qta Cuma pura2 tidor.pokoknya abis bauni sebe langsung ba minta pa ajus. Kong dorang dua pun “bermain” pa Qt ape sei. Qta lengkali rasa kasiang ja dengar ajus ja bataria.
Jadi pas tamang putar BF,Qta so nda kage. Pas bauni ni film,Qta pe cowo langsung ba plo mesra. Dia so mulai ramas2 Qta pe dada. Rupanya dia so terangsang,apalagi dia kan so minum. Qta le nda malawang. Soalnya Qta penasaran ,bagimana so depe rasa?? Blum riki klar tu film,torang dua langsung pi kamar,bakunci. Ini Qta pe pertama kali,bagimana kang?saki nyanda?kiapa ajus ja babataria? Akhirnya samua itu terjawab. Memang saki kalu pertama. tu dara pe banya ada taseka di sprei. Bagimana katu nda mo bataria? antara saki deng geli yang beking Qta bataria. Pertama kali ini blum beking Qta dapa rasa depe nikmat. Yang dapa lia nikmat Cuma Qta pe cowo,walaupun dia punya saki,mar dia bangga karna bongkar Qta pe poci. Qta nanti rasa nikmat pas torang dua beking untuk yang ketiga kali. Kali ini pa Qta pe kamar. Pas nda ada orang di rumah. Ajus deng sebe pulang kampung,sedangkan Qta pe kaka so nda tinggal di rumah. Mungkin lantaran penasaran,ni kali Qta komang yang agresif. Depe laste nda sia2,Qta bole rasa ena. Dokter2 bilang orgasme. Brapa kali stou ni tampa kincing kase kaluar cairan. Pengalaman ini beking Qta jadi suka mo beking trus. Lantaran tako mo hamil,jadi Qta pe cowo salalu ja pake kondom. mens datang teratur tiap bulan,Qta pun ketagihan mo suka rasa tu ena trus.

Mar ni kali,Qta saki hati da lia pa dia ada bakuplo deng cewe laeng.Qta so terlanjur sayang,depe bukti samua Qta punya,Qta kase pa dia.Ternyata dia nda sungguh2 pa Qta. Biar le Qta sayang,mar kalu so bagini,mo apa leh...So sama jo dia deng Qta pe kaka pe paitua,pambadusta. Abis manis,sepak takraw!! Pas Qta pe kaka bunting,eh tu laki2 brangkat deng tai2. akhirnya Qta pe kaka melahirkan tanpa pendamping. Depe anak skarang Qta pe oma yang jaga. Ada kase basar di kampung,supaya dia nda talalu malo,nda ada papa. Sekarang Qta pe kaka so jadi wanita panggilan. Sejak dia trauma,depe paitua kase tinggal,dia hobi ja bermain cowo. Depe sasaran tu cowo2 kaya. Dia ja minta dorang bli akang baju,cincin deng laen2. Qta pe kaka le katu balas dorang pe bae deng depe tubuh. Akhirnya ta trus,dia jadi lonte high class. Mulai dari pejabat sampe cina2 loleng yang banya doi ja pake pa dia. Skarang dia so ada rumah di perumahan real estate. Lantaran banya doi jadi dia pande urus badan. Tiap minggu dia rutin fines deng erobic. Lengkali dia selingi deng renang. Jadi depe bodi dapa lia seksi trus,padahal so satu anak. Pernah tre dia pigi Singapur for operasi depe bawa pusa. Dia bilang for mo beking span ulang,supaya sama deng cewe2 abg. Rupa2 jo dia itu,mar katu depe profesi ini so bantu2 torang pe kluarga pe ekonomi. Qta pe sebe cuma sopir mikro,sdangkan ajus cuma ibu rumah tangga yang skali2 ja babantu pa orang pe rumah.Qta pe kaka yang beking bagus torang pe rumah. Dia pasang akang tehel.kong bli kulkas,vcd,deng alat2 laeng.Dia bli akang mesin manjae for ajus,supaya kata ada hambak. Skarang ini dia sementara kumpul doi for mo bli akang mikro sandiri for sebe. Sdangkan Qta ,dia biaya akang les komputer deng bahasa inggris. Dia bilang supaya Qta bole langsung cari karja abis lulus sma.

Lengkali Qta ja bapikir,suka mo jadi sama deng Qta pe kaka. Dapa banya doi trus dapa rasa ena dari “pistol” yang berbeda. Qta ini so nda poci,Qta pe cowo so ada cewe laeng.Kiapa tidak Qta ikuti jejaknya kaka?
Akhirnya Qta babilang pa dia,kalu Qta suka mo jadi sama deng dia. Pas dia dengar,dia langsung tampeleng pa Qta. Dia marah,kiapa Qta sampe bapikir bagitu. Dia pun manangis kong jelaskan pa Qta bahwa depe profesi ini bukanlah ladang yang menjanjikan. Memang banya doi mo trima,mar tu beban moral yang mo pikul,brat skali. Orang2 tetap mo pandang enteng walaupun banya doi.Qta pe kaka ba khotbah pa Qta sampe beking Qta sadar.
Cukup jo dia yang jadi bagini. Setidaknya Qta beking sanang orang tua deng jalan yang butul.
Qta pun mulai kase lupa masalah deng Qta pe cowo. Biar jo skarang ini,Qta sandiri. Depe nya sadap,so nda ada orang yang boleh kase rasa ena.

Mar bae leh Qta pe kaka ada kase pinjam dildo....