Hari ini samua penghuni Rutan Malendeng shock. Dorang takage da lia tu menu makan siang. Biasanya cuma sayor kangkong deng so mujur kalu dapa ikang garam. Ni kali, menu istimewa...Nasi campur Padang, ada ayam, perkedel, acar plus podeng. Sapa yang nyanda mo bingo deng ni kejadian langka. Sedangkan tu sipir- sipir penjaga le heran da lia tu tumpukan dos makanan. Pembagian jatah makan siang langsung heboh. Samua suka mo bakurebe di muka. Apalagi for tahanan ato napi yang nda perna dapa besuk, dorang kadang ja makang ena, paling cuma ja dapa tampias dari tamang pe besukan. Pokoknya penghuni blok Anggrek, Melati deng Asoka langsung antri mo ambe jatah. Ada dua blok yang nda talalu antusias karna dorang itu laeng. Blok Kamboja deng Sakura itu hunian khusus. Kalo tu pengedar dg pemakai narkoba takumpul di blok Sakura. Sedangkan di blok Kamboja, punung deng napi ato tahanan kasus elit. Mulai dari koruptor, bankers, makelar sampe mantan Kadis takumpul disitu. Masalah makanan enak bukang topik yang menarik for dorang. Maklum, tiap hari dorang ja makang sadap. Besukan dari keluarga, tamang kantor ato anak buah salalu ja bawa makanan yang beking napi laeng malele ewe. Dorang lebe antusias kalu mo dengar tentang kebijakan bebas pake hp. Tapi namanya penjara, biar le tiap hari makang enak, tetap tu tidor nda nyeyak.
“woi..jang ba soso kwa...”
“popo ngana eh...!”
“antri kwa...”
Suasana antri mulai nyanda ta ator. Samua suka baku ruju. Dorang tako jang sampe abis tu makanan dos. Total penghuni ada 283. Kase kurang deng yang borju- borju, sekitar 250 orang da baku sesa, kecuali ni laki-laki pake singlet putih.
Dia nda iko barisan, langsung ka muka kong ambe dua dos. Nyanda ada yang protes. Mungkin cuma tahanan- tahanan yang baru maso da heran batanya, kiapa ni laki-laki nda dapa togor?
“Yop, sapa dia?” tahanan baru batanya pa depe tamang yang somo tiga bulan nginap di bui malendeng.
“sst..badiang ngana, jang sampe dia dapa dengar !!”
Situasi hening sejenak sampe tu laki-laki singlet putih so pigi pa depe kamar. Klar dia maso, rame ulang. Ternyata nyanda guna da baku-baku ruju, karna tu makanan tahede-hede. Samua dapa, sampe tu napi-napi elit dapa pembagian. Cek para cek, ini makanan sumbangan dari calon kandidat Walikota, Tammy Bernadette.
Kamar Melati 5 nyanda talalu basar. Depe normal, bole tampung 10 orang, Lima di koi beton, lima sisa ba alas di lante. Mar skarang, Melati 5 ada 17 penghuni. Ini kamar khusus for tahanan ato napi di bawah umur. Jadi tu pranggang-pranggang mulai dari papancuri, panjudi, pamabo, pambakalae sampe pranggang cabul takumpul disini. Kamar so dapa rasa sesak, mar bae le dekat tampa televisi. Jadi bole bauni sampe lat. Skarang ni pranggang-pranggang sementara asik ba makang.
“huuu...bagini kwa tiap hari !” Yopi basuara abis se klar depe makanan.
“io kang, kalu makang ena bagini, kita suka disini trus..”Okta le iko basuara. Ni tahanan baru memang sadiki tatoki. Dia maso bui cuma gara-gara pegang cewe pe panta.
“luji, ngana jo yang hidop disini trus !!” Yopi nda sanang deng okta pe ontak.
“mar Yop...sapa dang tu laki-laki tadi pake singlet?” Okta batanya.
“Ngana nintau so?”Yopi bale tanya.
“io nintau. Rupa pengaruh dia kang? Masa nda ba antri kong le ambe dua dos.” Okta masi penasaran.
“so dia tu dorang ja pangge BESI” Yopi coba jawab.
“BESI ??” Okta masi suka cari tau.
“kita le nintau depe nama asli, mar torang ja pangge pa dia BESI. Dia itu napi pertama disini. Kita dengar depe vonis 20 taong. So brapa kali pindah LP, perna di Tuminting deng Papakelan. Pas ni Malendeng mo buka, dia tapilih jadi penghuni pertama skaligus jadi kumtua. Yang kita tau dia itu jarang bacirita.” Yopi so jelaskan tentang sosok laki-laki bersinglet putih.
“kiapa dorang ja pangge BESI ?” Okta batanya ulang.
“kalo menurut carita, dia pe kasus 340 dg 338 ada hubungan erat deng besi. Tu korban-korban yang dia bunung, mati karna besi. Yang qta tau, dia da bunung satu keluarga. So itu vonis 20 taong. Sebenarnya tre hukuman seumur hidup mar BESI da nae banding.” rupanya Yopi banya tau tentang ni laki-laki singlet putih.
“satu keluarga ?” Okta penasaran
“io..dorang itu BESI pe majikan. Dia karja di toko bangunan. Kong satu waktu , depe Bos tuduh dia da pancuri besi kong da beking rusak Bos pe truk . Singkat carita, nintau karna tersinggung ato so mabo deng iblis so pake, BESI bunung depe majikan...laki bini deng anak dua.”
“wow !?” Okta totofore da dengar.
“mar versi laeng bilang, dia ja dapa pangge BESI karna depe badan so bobou besi, talalu lama di penjara !!”
Biar baru 1x ba sumbang makanan dos, Tammy Bernadette langsung top di Malaendeng. Samua penasaran mo lia bagimana ni calon Walikota pe wujud. Dapa kabar dari depe tim sukses, Tammy Bernadette mo iko ibadah natal di Rutan Malendeng skaligus mo kase diakonia. Tu napi-napi deng tahanan langsung sanang da dengar ni brita. Dorang pe mau bole mo terkabul, bakudap langsung deng Tammy Bernadette. Selama ini dorang cuma ja lia di koran ato televisi. Memang Tammy itu figur penuh kontroversi. Mar yang utama, dia itu vasung. Namanya penjara kalu bicara tentang parampuang gaga, nda mo abis-abis tu diskusi. Kepastian Tammy mo datang ba ibadah natal so beking Rutan Malendeng heboh. Skarang tiap kamar so rajin ja latihan manyanyi. Dorang suka mo sumbang suara pas jeda khotbah. Nyanda terkecuali, samua blok sibuk latihan.
Sehari sebelum natal, pengurus Greja so persiapkan perlengkapan. Mulai dari tata cara ibadah sampe kursi deng bangku so beres. Pujian sebelum dan sesudah khotbah so dapa tau depe banyak, 18 grup. Samua so persiapkan lagu. Selain manyanyi, tu napi deng tahanan mulai persiapkan penampilan. Buktinya, tu stok minya rambu di koperasi langsung abis. Samua suka mo tampil neces. Sapa tau Tammy Bernadette terkesan, kan dia blum kaweng. Ada gosip bilang, Tammy suka laki-laki macho deng jago manyanyi. Mungkin kalu olah vokal deng suara cuma pas-pasan. Mar status sebagai napi mungkin bole dapa kesan macho. Di kamus pikirannya Yopi & Okta, Napi = macho, jantan, liar.
Tanggal 25 Desember itu hari spesial for umat Nasrani. Samua mo maso Greja. Entah karna mo pamer baju deng spatu baru ato memang mo ba ibadah . Greja-greja vol deng jemaat. Kalo Greja laeng ada ibadah subuh deng sore, di Rutan Malendeng jadwal cuma 1x . Jemaat Abigael Malendeng nyanda sama deng Greja-greja laeng. Disini nda ada Penatua deng Syamas, yang ada Cuma pengurus Greja. Dorang ada 2 orang, napi kasus pencurian deng napi kasus cabul. Nyanda penting bicara dorang pe latar belakang, yang pasti dorang skarang sementara melayani Tuhan.
Jam stenga 9, Greja Abigael so vol. Selain karna mo ada tamu khusus, Greja vol deng napi pe keluarga. Banya yang suka rayakan natal deng orang-orang tercinta, biar di penjara. Lantaran so padat, jadi musti tamba kursi deng bangku. Tepat pukul 9, Tammy Bernadette sampe di Greja. Dia langsung jadi pusat perhatian. Samua mata tatuju pa dia. Kali ini, Tammy pe penampilan minimalis. Mar tetap maksimal for arjuna-arjuna Malendeng. Ibadah pun dimulai. Berjalan lancar deng tamba menarik pas sesi puji-pujian dari tiap grup ato perwakilan. Tammy Bernadette pun kagum da lia ni talenta yang ada. Dia pun nyanda ketinggalan mo lantunkan pujian natal, “o holly night”. Ternyata depe suara nyanda beda-beda jao deng Mariah Carey.
Aplaus pun bersahutan pas Tammy klar manyanyi. Biar tu laeng nda mangarti apa tu lagu pe arti karna pake bahasanya David Beckham. Klar manyanyi, cuap-cuap sadiki tentang rencana pencalonan Walikota, Tammy langsung kase tu diakonia secara simbolis pa pengurus Greja, satu set alat musik (keyboard,drum,gitar plus sound system). Itu for Greja Abigael, sdangkan diakonia amplop for napi nanti klar ibadah pas sesi jabat tangan. Sebenarnya abis Tammy manyanyi, Pendeta so siap mo lanjut ka persembahan, mar masi ada kote yang mo bawa puji-pujian. Bukang vokal grup mar solo. Perwakilan kamar asimilasi alias tua-tua malendeng, laki-laki identik deng singlet putih yaitu BESI, mo manyanyi. Samua tahaga, kage !. Selama ini, BESI nda perna manyanyi di Greja. Di dalam sel pun, kadang ja dapa dengar depe suara mo bersenandung. Paling cuma pas dia bauni depe sinetron favorit, “Cinta dan Anugrah”, BESI ja manyanyi ST 12 pe lagu. Itu pun cuma samar-samar. Otomatis,momen BESI mo manyanyi lagu rohani beking samua kage. Suasana pun hening...BESI pegang gitar akustik kong mulai bermain,
...teringat saat natal bersama di kampung halamanku, terkenang
wajah mama papa yang aku kasihi
bertahun sudah kita tak jumpa, hati ini sangat rindu
Tuhan sertailah mereka
...kini satu lagi tahun berganti di hari hidup kita ini
adakah kita kan bertemu, adakah Tuhan
selangkah saja maut menghampiri, pada hidup kita ini
Tuhan sertailah mereka...
Memang ni lagu so banya kali ja dengar. Di kaset tape, mp3, di radio ato di mikro. Mar kiapa stou ini kali depe nuansa beda skali. Dengar ni lagu di Penjara kong yang manyanyi napi hukuman 20 tahun bekeng ni jemaat yang hadir langsung bakaca-kaca. Ni lagu tasontong skali di hati. Tammy Bernadette pun ambe lengso di tas.
...bila ku ingat kembali, kasih sayangmu yang tlah
membesarkan daku
ingin rasanya ku kembali, pada manisnya masa
kecilku dulu,
mama...selamat natal mama...
papa...selamat natal papa...
mama...
papa...
Abis reff, BESI mulai ba melodi. Memang nda sama deng Slash, mar di momen bagini rupanya BESI pe skill gitar, mengalir bagus..blues skali. BESI main deng penghayatan tinggi dan klimaksnya...napi sekelas BESI ternyata nda mampu tahang tu aer mata mo maleleh...dia so nda dapa tahang !
Besi so nda dapa manyanyi, tingal ba gitar.
...mama...selamat natal mama
papa...selamat natal papa
mama...selamat tahun baru
papa...selamat tahun baru
So bukang BESI yang manyanyi, jemaat yang so ganti ba koor sama-sama.
Manyanyi kong seka-seka tu pipi...lengso punung deng aer mata
Yopi berbage tissue deng Okta.
