Hmm..so lama nda ba posting,gara2 skrg tiap hari musti bolabale tondano-manado
Mmg lalah mar biar jo daripada nda lia anak istri..
Ni bulan mmg rame,manado le iko barame dg kibaran2 bendera.
So sama dg markas PBB..samua krn piala dunia!
Mmg ni pesta ampa taong 1x bkg suasana jd laeng..samua org rela nda tidor cm gara2 mo lia drg pe tim bermain.
Selain bauni,banya yg ja spekol bataruh..
Tadi baru klar pertandingan trakhir babak 16besar.
Belanda,Jerman,Argentina,Brasil,Spanyol,Uruguay,Paraguay,Ghana so tampil meyakinkan.
Drg 8 mo baku toki mo cari tiket ka semifinal!
Ada 2 bigmatch yg beking spanen,Belanda vs Brasil dg Jerman Argentina.
Dapa lia sapa yg mo lolos,itu tu calon juara!
Tragis for tim2 favorit laeng yg musti keok..Inggris yg banya org prediksi moi juara krn pelatih jago musti pulang da kalah pa Jerman.
Lebe soe tre Itali dg Prancis,so kandas di babak grup tanpa kemenangan.
Mar ini noh tu pialadunia pe dayatarik,depe kejutan lengkali bkg org manangis!
Jadi tinggal mo tgu sapa yg mo pegang tu tropi!
Ni bulan juni sm abis,bny kejadian yg mengejutkan.
Dua kali ciri di aspal jd kenangan yg susa mo se lupa!
Napa ni rusuk masi saki...

ha detto cuore di un uomo non è stato bello

Era una bella donna, se lei mi piace !!

artinya : ^_^

Kata hati seorang bisae :
"cewe itu gaga kalu dia suka pa qta!!"

Football Party

Akhirnya bulan juni!voor kaum gilabola,so lama da tgu2 ni momen..yup,pesta ampa taong 1x,Piala Dunia!ni kali mo beking di benua afrika,tepatnya di afsel..kalo mo lia di atlas,dapa rasa jaoh,so dekat kutub!mar biar jao,tetap banya yg suka mo kasana..khususnya for 32 negara yg mo bertarung.
FIFA cm batasi tiap negara se daftar 23pemain. Mungkin bagi pelatih Korut dg Aljazair nda talalu susa mo pilih skuad terbaik. Yg pusing tu pelatih timnas negara2 kuat. Capello dg Maradona pasti bingo mo tentukan mana yg mo pi afsel. Amper samua pemain da kerahkan drg pe kemampuan terbaik di musim 09/10 spy bole tapilih jd pemain timnas. Malah ada yg mungkin talalu smangat sampe tre dapa cedera. Beckham,Ballack dg Essien contoh pemain bintang yg musti rela jd penonton karna drg pe kaki so cedera. Mar tanpa drg,Piala Dunia tetap mo spanen. Samua nda sabar mo lia messi pe jago,cristiano ronaldo pe makang puji ato mo tunggu lippi pe racikan. Yang pasti skrg so banya yg bakumpul doi for mo bataruh akang. Memang ada kenikmatan lain pas bauni bola kalo da bataruh. Mar biar nda bataruh,Piala Dunia tetap beking penasaran..berbagai gol cantik,pelanggaran brutal,tawa kemenangan dg air mata kekalahan mo warnai ni drama sepakbola.
Selamat menikmati Piala Dunia!!
Dan blog tetap pegang Belanda..
VanPersie,Robben,Sneijder dkk mo bembeng ni trophy!

Kecemasan Seorang Ayah

Menjadi seorang papa adalah sebuah kebanggaan yg nda samua org bole rasa..
Puji Tuhan,di umur yg masi tergolong muda qta so bole jd papa..
Yg lebe istimewa,anak pertama yg Tuhan kase itu laki-laki!jd ni fam lumenta so tatambah generasi..
Menjaga anak dari dia bayi sampe skrg so tau bajalang,pengalaman yg istimewa!
Dari noel musti ja plo trus,taru di boks,se nae babywalker,nae speda sampe ja tuntun blajar bajalang.
Karna so tau bajalang sandiri,noel so jd nakal skali..nimbole ilang mata,kage dia so di muka place..
Dia suka skali main ember..ba ojo di tanah main aer..pokoknya so dapa lia depe begal!!
Cuma ni hari,noel KO..dia pe badan panas,trus kablakang trus..
Cek para cek,dia kote da tatamba gigi..jd dia skrg saki.
Sebagai papa,tantu qta khawatir..bae le ada obat!
Mar qta yakin Tuhan mo jaga pa noel!!
Semoga noel cepat bae spy bole bermain ulang..

May Day

Waktu mmg nda ja dapa rasa.di kalender so maso di bulan kelima yaitu bulan mei.padahal di brapa rmh,tu minuman natal masi tasisa..kiapa kong blum abis2 dunk?itu depe tanda tu rumah wkt natal nda buka pintu a.k.a sadiki koncudu. Btw,lupakan ttg x'mas karna skarang somo tenga taong.
Itu depe arti sm bulan juni,bln keramat for pecinta bola..turnamen terakbar deng paling prestisius yg cm ja beking tiap 4 taong..samua so nda sabar mo lia tu seniman2 bola mo beraksi,ada messi,CR9,kaka,rooney sampe si hitam manis drogba mo berjuang demi nama negara..trus trg pe negara dunk?indonesia??cuma penonton!tragis mmg,kalo mo inga tu penduduk sekitar 200jt lebe mar nda mampu mo bkg kesebelasan tangguh yg bole lolos piala dunia. Mar bagimana mo jago?sdgkn liga lokal salalu rusuh!yg pasti piala dunia mo hadirkan berbagai kejutan yg bkg torang samua penasaran..mar sebelum itu,ada final champion,final europa league deng liga2 eropa yg somo klar..inter vs munchen mmg mengejutkan,prediksi ni blog jd nda akurat krn tim mourinho se kandas pa juara bertahan.ada hal menarik yg jd perhatian yaitu peran duo holland,robben deng sneijder bagi tim masing2 yg sangat signifikan.drg dua jd roh tim..depe ironis,drg ini buangan dari real madrid yg ni musim da baroyal se dtg pemain2 mahal.padahal ni kali final champion mo bkg di santiago barnebaue ,kandang real.jd robben dg sneijder mo reuni di bernebaue skaligus mo show pa publik madrid bahwa uang bukanlah penentu sebuah prestasi!
Sepakbola memang olahraga yg paling populer..kota manado le so nda sabar mo bauni final champion trus sambung piala dunia..btw,hari ini tgl 1 mei alias may day,hari buruh!! Kaum yg sampe saat ini masi sering ditindas..upah yg tak sesuai,perlakuan semena-mena maupun jaminan keselamatan yg parah masi jd persoalan2 klasik for buruh2 sedunia..semoga ke depan kaum buruh bisa meraih kesejahtraan..finally,selamat datang bulan baru!!

Tetap Eksis

Puji Tuhan..ni blog masi tetap eksis..
Padahal banya masalah yg lengkali bkg qta nimbole ba posting.
Mar bae leh bole baposting dari hp..
Kalo depe masa awal,ni blog lahir dari warnet..
Trus bole dari hp,trus dapa berkat bole bli netbook..
Jadi skarang baposting bole dari rumah..
Biar sementara jaga pa noel,tetap bole update..
Memang katu,fasilitas mempengaruhi kreatifitas!!
Thanks neh so maso ni blog..GBus!

Musim Sepakbola yang Spanen

Biasanya yang spanen2 itu ada di film action, mar ni kali terjadi di lapangan hijau.
Setelah brapa taong terakhir terkesan monoton karna sebelum liga klar, masi jao so dapa tau tu juara, ni kali komang tu penggemar bola banya yang penasaran karna sampe minggu ketiga april tu liga2 top eropa so maso depe saat paling spanen. Tiga liga paling top, Inggris, Itali deng Spanyol sama2 seru. Depe pimpinan klasemen cuma beda 1 poin,Chelsea vs MU, Roma vs Inter dg rival klasik Barca vs Madrid. Dengan sisa partai yg tinggal sadiki bekeng samua tim musti hati-hati deng nimbole tapalisi. Pokoknya kalah jo 1x pasti langsung tageser.
Di Inggris dominasi MU slama tiga taong terakhir akhirnya sadiki ta oncang karna Chelsea ada pelatih baru, Ancelotti. Memang sebenarnya Ancelotti pe tugas utama for kase rasa juara Champions karna dia so pengalaman 2x angka tu piala waktu dg Milan. Mar Chelsea musti kalah di Perdelapan final pa Inter. Ancelotti masi aman karna depe alasan Chelsea butuh waktu. Mar di domestic, Ancelotti sukses sampe final FA deng peringkat 1 liga sampe akhir April ini. Kalo memang konsisten, bukang mustahil Chelsea bole dapa double!! Dorang pe saingan MU memang masi jago, Sir Alex mo kase bukti kalo MU itu nda tagantong pa CR7. Jadi biar so nda ada tu pemain making puji itu, MU masi tetap jago. Ni kali Rooney se tunujung depe skill. Sayang dia da taganggu cedera pas MU malawang Munchen yg akhirnya bekeng MU keok. Mar setidaknya MU masi jadi kandidat kuat juara liga karna selisih poin cuma 1. Hasil trakhir for liga inggris kemungkinan besar akan seru sampe partai trakhir. Perkiraan blog, Chelsea yg mo juara!!
Amper sama deng di Inggris, Liga Itali le skarang lagi spanen skali. Dominasi Inter yg muncul karna kasus Calciopoli so maso di tahap beking pastiu. Nintau kiapa ni Inter nda ada ada wibawa yg bole mo bekeng orang kagum. Jadi orang2 masi pandang enteng deng Inter pe Scudetto. Dorang masi anggap Inter ja juara karna Juve deng Milan lagi tahap pembenahan akibat dapa hukuman calciopoli. Mar memang Inter nda meyakinkan, buktinya Cuma Berjaya di domestic, ancor di Champions. Bae le ni musim Inter so ba kuat sampe maso semifinal. Yg bekeng Inter sadiki orang kagum karna depe pelatih Mourinho talalu sombong!! Yang pasti prakiraan blog ni musim Inter mo hampa…yang mo juara liga itu AS Roma. Dorang main bola dengan hati, secara tim dan bermodalkan semangat. Dan wajar kalo Roma mo scudetto karna dorang da berjuang kras.
For liga Spanyol, Cuma Barca deng Madrid yg baku ganti juara selama brapa taong trakhir. Mar ni taong dapa lia masi for Barcelona. Musim lalu Barca Sempurna!! Samua gelar dorang boyong, Messi pun jadi pemain terbaik dunia. Memang mempertahankan lebe susah disbanding merebut. Buktinya ni kali Barca so keok di Copa Del Rey. Cuma di liga dorang berhasil se kalah pa Madrid di el classic yg menurut blog jadi penentu gelar juara. Madrid pun ni musim tetap mo gigi jare. Biar le so se abis doi banya for CR9. Kaka, Benzema, Alonso, Albiol dkk, tetap Madrid blum mampu juara. Hal fatal menurut blog adalah faktor pelatih. Pellegrini nda mampu kordinir ni kumpulan bintang yg notabene egois. Klub setenar Madrid semestinya dilatih Wenger ato Capello. Cuma pelatih berkharisma yg mampu bekeng Madrid juara. Jadi for ni musim, masi for Barcelona.
Bauni bola memang seru. Selain tiga negara tadi, di Jerman, Belanda deng Prancis le sadap ja ikuti depe perkembangan. Munchen vs Schalke, Twente vs Ajax, Bordeaux vs Lyon. Tu selisih poin pimpinan klasemen tipis2, jadi mo seru sampe akhir.
Piala UEFA yg so ganti nama liga Europa so maso 4 besar. Kemungkinan yg mo juara adalah Liverpool, karna dorang tinggal bakuat di ajang ini, dorang so ancor di liga.
Liga Champions le so maso 4besar. Menurut blog, final ideal adalah Barca vs Munchen. Memang Barca kuat, mar ni kali Munchen yg mo juara. Robben jadi kunci for Munchen. Selain itu tradisi nda memihak Barca karna sejak bernama liga champions, blum ada juara bertahan bole mo pertahankan depe gelar. Jadi ni kali Van Gaal yg mo tangisi.

Jadi bauni bola di musim 2009/2010 bekeng spanen. Mungkin ini gara2 somo Piala Dunia 2010 Afsel. Mmmh, Cuma jadi sedih kalo mo inga bola dalam negeri. Bagimana kwa mo maju kalo depe pimpinan PSSI so nimau diganti. So nyata2 gagal masi ba kras leh. Emplas malo kong lengser kase kesempatan org laeng. Mudah2an E.E Mangindaan jadi Ketua PSSI supaya bole ada perubahan.
Memang Sepakbola itu bagaikan candu…dalam 1 minggu nda lia bola rasa gila…