Rabu, 29 Juli 2009

Akting bersama Teater Kromis

Cover Lusy edisi Perdana

Kisah Kasih Seorang Pecundang

Kisah Kasih Seorang Pecundang

“..Cin,sebenarnya so lama Qta mo suka bilang. Mar kiapa stou baru kali ini Qta brani mo ungkapkan. Mar kwa, biar le Qta nda bilang, paling ngana so tau. Dari Qta pe sikap yang dulu, yang memang kalu mo jujur,talalu vulgar!yang akhirnya beking Qta nda bisa raih ngana pe simpati. Dan ini yang beking Qta nimau mo ungkapkan saat itu,karna Qta tau pasti akan ada penolakan. Akhirnya Qta Cuma bole pendam ini perasaan. Dan Qta cukup sanang kalu ternyata torang dua pe hubungan nda jadi tajaoh semenjak Qta pe manuver. Memang di brapa saat, Qta jadi malo kalu mo bakudapa deng ngana. Mar Qta sanang kalu trnyata Qta masi bole dengar ngana pe suara biar Cuma di telpon. Biar Cuma brani di telpon,soalnya kalu mo bicara langsung,rasa bagimana stou??ngana pe pesona beking Qta jadi tabadiam tiap kali lia pa ngana, seakan-akan ni bibir jadi taslot. Qta cukup lama ada pendam ni perasaan. Dan skarang Qta pikir so pas depe waktu for mo ungkapkan. Ngana deng Qta so nda perlu malo tamang-tamang mo gara, kan torang dua so klar kuliah. Sama-sama so karja, Qta pikir torang dua so lebe dewasa. Dan ngana pasti so tau Qta pe orang bagimana. Jadi skarang Qta so nda ragu mo bilang kalu Qta ini suka pa ngana…!!!”

Kira-kira dua menit Teddy melamun di muka kaca. So brapa hari ini, dia ja latihan dalam kamar supaya lancar pas mo bakudapa deng Cindy. Memang sosok Cindy nda akan perna ilang dalam pikirannya Teddy. Semenjak pertama maso kuliah,tepatnya pas masa ospek, Teddy so tertarik pa Cindy.

Dan perjuangan Teddy for mo taklukan Cindy cukup menyolok. Depe imbas, samua tamang-tamang kampus jadi tau kalu Teddy itu ada perasaan pa Cindy. Dan ini yang bekingCindy jadi pastiu pa Teddy. Maklum, Cindy itu cewe pamalo. Dia nda suka kalu orang-orang ja gara. Dan hal ini sangat fatal for perjuangannya Teddy. Depe laste, Teddy pe usaha jadi sia-sia. Dan Teddy pun nimau bapaksa mo tanya, karna dia tau pasti mo dapa tolak. Akhirnya dorang dua jadi agak tajaoh alias bajarak. Situasi jadi serba salah. Teddy so patah semangat dan Cindy sendiri dapa lia nda talalu ambe pusing karna memang nda ada getaran yang dia rasa. Diukur dari face,memang Teddy bukang cowo fasung. Mar yang Cindy nintau, kalu Teddy itu butul-butul suka dan depe rasa suka itu bukan nafsu alias murni. Waktu pun bajalang trus. Nda rasa, dorang dua so klar kuliah. Teddy so jadi PNS,sementara Cindy so karja di bank. Yang beking sanang pa Teddy, pas masa-masa akhir kuliah, depe hubungan deng Cindy so nda jaoh lagi. Dorang dua so mulai bicara ulang. Teddy pun jadi sering batelpon pa Cindy, sekedar curhat ato bicara studi. Dan Cindy nda tako lagi mo bafrei karna Teddy so ada cewe. Mar sebenarnya, biar so ada cewe, Teddy pe hati masi bahara pa Cindy. Dia nya mo talupa tu Cindy pe bayang. Dia masi ja bahayal kalu dorang dua akhirnya batona.
Akhir-akhir ini, tekad Teddy so lebe bulat. Dia so putuskan mo tanya, dalam arti dia somo ungkapkan depe perasaan yang sesungguhnya,supaya nda mo tapendam lebe lama. Dia so nda pusing mo dapa trima atopun mo dapa tolak. Kan skarang so nda ada tu tamang-tamang yang mo baterek. Teddy pikir dia musti ungkapkan secepatnya supaya depe hati bole mo plong en lega karna so nda simpang-simpang tu depe perasaan.

Kala Teddy berapi-api dalam persiapan mo ungkapkan depe perasaan,di tempat lain tepatnya di Tendy Studio, Cindy sementara ba pas gaun rancangan om Chok.

* * * * *


Untuk Seorang C

namamu
kan slalu menghiasi
hati ini
gagal menaklukanmu
membuatku lebih penasaran
entah kapan
malaikat cinta kan mendengar
doaku ini
ku masih menyukaimu
jika saja kau mengerti aku
skali lagi,
jika saja kau memberikanku kesempatan…..

catatan : ini Teddy pe puisi for Cindy. Dia beking pas klar baku telpon deng Cindy.

Soe Babi !

Nintau sbantar mo pake baju apa? memang ini malam minggu, mar ni kali beda deng yang sebelumnya. Ni malam mo bauni konser slank!! Memang so lama Qta ada tunggu2 ni grup mo kamari. Konser2 trakhir depe band nya talalu istimewa. Masa tuhari Dygta deng Radja konser di Klabat? wajar katu kalu sadiki tu bauni, paling yg datang Cuma orang2 tuminting deng wonasa : )
Jadi pas dengar Slank mo datang, Qta so bilang dari jao2 hari pa Brian ( Qta pe cowo ) kalu Qta suka mo bauni. Bae leh Brian suka ja dengar Slank pe lagu2, beda deng Butje,Qta pe cowo dulu. Lantaran tinggal di gunung, depe selera musik le tradisional. Jang tanya makaruyen, aid kipas !!

Waktu KKN, Qta dapa penempatan di Amurang. Tiga bulan disana, otomatis banya yang badekat, salah satu Butje noh. Qta kwa pe niat Cuma iseng, cari kenang2an. Tambah le Butje pe face di atas rata2 plus bodi yang tabentuk gaga, maklum hari2 di kobong, bapacol. Biar katu Cuma bakobong, dia itu tamat sma, jadi dari segi intelektual, menunjang. Kalu mo bicara sadiki nyambung, beda deng depe tamang2 laeng, yang rata2 pata pinsil. Dua minggu depe pendekatan, pas dia tanya Qta nda jawab. Qta bilang jalani jo dulu, kalu memang cocok brarti Qta deng dia bole mo jadi noh. Depe sadap ada paitua di posko, logistik lancar!! Amper tiap hari dia bawa akang buah2. Pas waktu itu ada musim rambutan. Depe sadap laeng, tiap hari makang enak. Kan Butje pe kluarga ada talaga deng ba piara boke, otomatis ikan mas deng tinorangsak jadi menu andalan.

Tiga bulan Qta deng dia jalin hubungan. Yang beking Qta tatawa, dia itu cowo pamalo. Kalu Qta badekat, depe pongo2 ja merah. Sedangkan badekat dia so gugup, apalagi mo harap tu hal2 laeng. Pegang tangan pun jarang. Mar hubungan bagini beking Qta nyaman, beda deng cowo2 kota yang maniso! Batona sama deng ini beking Qta tainga tu dulu2, sama deng smp2, batona malo2. Sayang KKN Cuma tiga bulan, jadi ni hubungan Cuma tiga bulan leh. Pas perpisahan, Butje antar pa Qta sampe terminal. Supaya terkesan romantis, Qta sun katu noh pa dia. Biar Cuma di pipi, mar itu jadi Qta pe tanda makase so jaga2 pa Qta ni tiga bulan ini. Butje pun tinggal jadi kenangan.

Bicara cowo, Butje itu mahkluk ke 7 yang jalin hubungan deng Qta. Jadi Brian cowo ke 8 yang jadi deng Qta. Tepatnya cowo ke 6 yang tembak pa Qta, soalnya ada 2 cowo, Qta yang tembak: )
Brian itu Qta pe ade tingkat. Dekat deng Qta lantaran sama2 pengurus senat.
Sama2 suka mie cakalang deng minum teh botol. So lima bulan Qta jadi deng dia. Jadi, ini malam minggu yang ke 21 Qta mo bajalang deng dia. Ni kali torang dua mo bauni konser slank. Rencana mo pake kets adidas nda jadi, Qta pe ade ada pake kote, dia so kaluar lebe dulu. Mo pake hak nya mungkin, yah terpaksa pake converse andalan. Sebenarnya sayang kwa mo pake ni spatu, soalnya baru bli. Biar jo, daripada Cuma mo pake swalow, kage bangka2 ini kaki dorang mo injang2. Spatu sudah, kaos oblong deng clana tinggal mo pilih. Kalu samua sudah, tinggal mo mandi trus tunggu Brian batelpon.

Jarum jam so di angka 7, Brian so di muka pintu. Abis ba bilang pa sebe deng ajus, torang dua langsung pigi. Soalnya so lat, mo bakurameji cari tampa gaga. Ni konser laeng deng yang dulu2, depe tiket maso Cuma 10ribu, tergolong murah!! Kira2 stenga jam perjalanan, torang dua pun sampe di klabat. Dan tiket yang murah beking ni slankers tatawa cina. Depe imbas, klabat jadi sesaa. Mar ini katu baru bilang konser, penonton banya beking depe suasana jadi asik. Brian deng Qta terpaksa bakuruju for mo cari tampa dimuka. Mo cari tampa bagus, napa Brian ada bawa tustel. Akhirnya setelah berjuang basoso di kerumunan, torang dua tumbus di paling muka. Lumayan, biar depe resiko ni toto ja tatasontong pa orang2. Nda apa2, Cuma tasontong kwa.

So fugado ni badan, kaka deng depe tamang2 blum muncul2 leh. So satu jam stou ada batunggu. Bae leh tu tiket ada tukar deng roko, jadi sadiki terhibur. Masalah roko, Qta ini termasuk pemadat. Minimal 5 batang tiap hari. Mo bilang apa leh, sdangkan kwa Qta pe ajus pemadat. lengkali tre torang dua batarek sama2 kalu sebe nda ada. Ajus bilang baroko nda apa2, yang penting jang pernah sontong tu narkoba. Yah, sdangkan ajus kase izin, otomatis paitua le musti kase. Bae leh Brian mangarti. Dan memang dia itu suka pa Qta apa adanya. Qta baroko, diapun iko baroko. Somo stenga bungkus ni roko, Slank blum muncul2. Ada baapa stou dorang?
Memang konser musik itu asik!! disini Qta bole cuci mata sepuasnya. Ada ribu tu cowo disini. Ngana haga kiri, haga kanan, haga blakang..cowo!! Depe jenis leh ada banya. Ada yang junkies, kurus pake jins kaki kuda. Ada leh yang funky, rambu pirang calana gombrang. Mar ada leh yang bakumis, pake kameja. Memang katu Slank pe penggemar itu variasi. Ada yang angkatan “Maafkan”, angkatan ”Kamu Harus Cepat Pulang, angkatan “Balikin” sampe yang paling baru angkatan “Ku Tak Bisa”. Samua takumpul disini for mo bauni pa kaka, bim2, abdhee, ridho deng ivan.

Ni mata nda mo tenang ja lia tu tampang2 yang menarik. Mar jang kira Cuma Qta yang cuci mata, paling leh Brian ja bagambar tu cewe2. Memang depe jumlah nda sebanyak cowo, mar biar kalah kuantitas, cewe2 yg datang depe kualitas beking tu cowo2 malele ewe. Lantaran stou tau mo fugado, tu cewe2 banya yang Cuma pake satu tali. Otomatis Brian pe mata leh ja kasana kamari. Biar jo katu, masa Cuma Qta yang lia cowo gaga.

Biar le banya cowo gaga, mar ni bitis so kram ada batunggu. So bareis stou? Talalu beking diri komang ni Slank, masa so satu jam stenga dorang bking batunggu. Sementara pastiu2 lantarang fugado batunggu, kage lampu2 dorang kase mati. Penonton langsung bahura. kan ini depe tanda kalu konser somo mulai. Memang butul, intro “I miss u, but I hate u” so dapa dengar..penonton pun langsung histeris waktu Kaka mulai manyanyi. Koor plus lompatan massal jadi hal biasa, maklum samua Slank pe lagu so familiar.

Dua puluh lagu stou dorang so bawa, nya rasa so jam stenga seblas. Biar le masi suka mar inga pulang noh. Mo susah oto kalu mo tunggu konser klar. Bayangkan jo tu 5000 orang badola oto sama2. Jadi Qta deng Brian so pulang biar blum klar. Bae le langsung dapa oto….
Pas mo bayar, Qta kage tu dompet so nda ada. Memang ada bakuator, Brian bli tiket konser, Qta bayar doi oto. Mar mo bayar bagimana le, tu dompet so nda ada…..

Pe lubalubangpuki leh...sudah jo tu doi, mar tu KTP , ATM...deng tu 8 pas foto !!?!?!...

Selasa, 28 Juli 2009

Lubuk Hati

Lubuk Hati

qta suka pa ngana apa adanya
qta paling suka ja lia ngana pe senyum

qta tetap suka biar ngana larang qta baminum
qta masi tetap suka biar ngana suru qta brenti baroko

qta makin suka pas torang dua maso greja sama2
qta jadi suka skali waktu ngana se inga trus berdoa


qta akan slalu suka pa ngana …

LUBANGP**I DALAM HATI

LUBANGP**I DALAM HATI

kiapa kong sampe persoalkan qta p masa lalu ?
itu kan carita dulu…kiapa kong musti mo ungkit2 ?
qta ini cuma manusia biasa, yang punya catatan kelam…
nda ada yang bole qta beking !
qta nimbole mo rubah masa lalu…
yang lalu so terjadi !!
skarang qta mo tatap masa depan…
nintau kalu ngana bole trima qta pe diri
apa adanya ….
qta pun nimbole paksa pa ngana
kalo memang ngana nimau trima qta pe lalu2
brarti ngana nda mangarti pa qta
qta suka mo buka lembaran baru
yang cerah…
ceria…

deng ngana !!!

Kata Hati

Kata Hati

Salah satu karya surga telah turun di hadapanku
Seakan-akan memenuhi benak ini
Entah apa yang membuat diri ini berani
mengambil resiko..

melepaskan ikatan hanya untuk menantang sebuah ketidakpastian

sulit..
rumit..
pahit !!

namun,
seseorang harus selalu sabar menanti kemenangannya

karya surga itu pun
kini telah bersamaku..

KUDAC**I DALAM HATI

KUDAC**I DALAM HATI

biar le somo 2 taong, ni hati so terlanjur beku…
depe aer mata so nda mempan
Qta so nda mo luluh!
depe carita so laeng..so ada yang laeng!!

mungkin Qta ini memang egois..
mar Qta ini cuma laki2 biasa

memang nya mo bagini kalu dia itu mangarti pa Qta
dekat deng tamang2
ato nda talalu posesif

mungkin Qta mo suka bertahan
biar tu perbedaan bapeleh

di sudut hati yang kacili, ada babise :
sayang..

di sudut yang laeng :
baru sayang, blum cinta !!

Anti Anus

ANTI ANUS, ANJ**G !
(AAA!)


Mo lobang gua !!
Mo lorong kacili !!
Mo terminal oto !!
Mo blum da jalang ?!

Rimbas…


Raja singa
HIV
Garuxxx
Kincing nanah

Stau…


Tanta
Youngen
ABG
Ladies
Mahasiswi
Lonte
Tambio
Tamang pe maitua
Enci
Senior
Boss
Cewe di mikro
Tukang ba uru
SPG
Ade tingkat
Chayank2

Yang penting HAWA !!

BUKANG LOBANG PANTA !!!

MANISO MO KALUAR

MANISO MO KALUAR


Eeehh…

Laju jo jang qta somo ilang mau

Buka jo jang tunggu qta paksa

Goyang jo nya usa malo-malo

Simpang jo nya perlu pake tu dia


Plang jo
So sadap
Sadia jo
So di ujung


Ooooohh…


Seka jo
Somo bobou
Mandi jo
Somo abis jam

Aaahhh


Beso jo
Kurang so ?
Lengkali jo
Laa so ?!?!

Uuuuhh…

Lovers

“Beso mo jadi ?” Rey batanya pa Lisa.
“nintau leh, mudah2an papa kase..”
“yah, blum pasti dang? masa ngana tega kase biar Qta sandiri di malam minggu..” Rey stenga bapaksa.
“nanti lia jo kwa..Qta mo usahakan !!” Lisa balas jawab.

Suasana kampus ni hari memang pas for yang so atona. Ujang rinte2,langit somu2 plus udara dingin beking tu kemesraan lebe dapa rasa. Telapak2 tangan so bakudapa, bicara jadi syahdu. Yang baru jadi, paling masi malo2. Jang tanya pa yang so babunyi 2 taong, dorang so nintau malo !!
Ni cuaca bagini, bukang cuma cocok for yang atona. For mabokers alias para pecinta alkohol, ni suasana sadap skali for mo 3 par. Selain karna cuaca, alkohol jadi pelarian for yang nya ada par. Daripada malele ewe mo lia2 orang atona, lebe bae baku-spy deng botol!
Rey dulu termasuk kategori mabokers. Abis kulia langsung bercinta dengan miras. Carita jadi laeng pas Rey lia pa Lisa, mahasiswi baru. Biar bukang panitia Bismaba, Rey termasuk mahasiswa yang cukup dikenal lantaran depe prestasi musik. Dia so brapa kali dapa predikat the best gitaris. Jadi, biar pamabo dia ada kelebihan. Waktu dia lia pa Lisa, depe naluri laki2 langsung muncul. Entah karna Lisa pe gaga ato lantaran so siksa sandiri. Rey pun mulai pdkt, hasil akhir = pejuang diterima !!
(“ ,)
Kulia bukang rencana utama for Lisa. Dia sebenarnya mo suka jadi perawat. Mar depe papa mau Lisa jadi sarjana. Akhirnya demi kase sanang orangtua, Lisa pun kulia. Dari kacili, Lisa so hidop dalam lingkungan keluarga yang taat ibadah. Papa, syamas kolom..mama,kordinator kom ibu. Jadi, dari jaman skola minggu sampe ibadah pemuda, Lisa slalu berusaha hadir. Nda heran kalo skarang dia jadi Kordinator Remaja. Kalo mo lia, Lisa pe hidop itu nda sama deng depe tamang2 satu rang. Kalo yang laeng sibuk hafal Dewa ato Padi pe lagu, napa Lisa ada stenga mati hafal ayat2 Alkitab. Suka bantu orang beking dia ingin jadi perawat. Mar rupanya Tuhan punya rencana laeng. Lisa musti jadi sarjana, otomatis kehidupan kampus harus dilewati. Sampe lulus SMA, Lisa blum perna atona. Lantaran talalu alim, beking depe tamang2 cowo jadi tako mo badekat. Padahal di lubuk hati terdalam, Lisa le suka mo rasa bagimana tu atona?. So itu skarang dia so brani mo atona, kan so mahasiswa! Kalo dulu nintau bapake, skarang so musti brubah. Bae le Lisa ada tante gaul,Syul depe nama. Tante Syul yang kase ajar Lisa bagaya. Biar nda seksi, yang penting tu inner beauty so nampak. Nda percuma Syul ada ajar, Tiga cowo badekat pa Lisa. Belly, Ekhi deng Rey. Belly, panitia Bismaba.. Ekhi, anggota BKK sdangkan Rey, mahasiswa biasa, pamabo!! Nintau ada tainjang kodo, pake goraka ato setang ada tola... Lisa io pa Rey.
( “, )
“Nyong... so lomboan ini ??”
“napa gate dulu supaya lancar bicara !!”
Rey pe tamang2 nya brenti ja bagara.
“Biar jo, atik istirahat dulu.. napa tu dada so barasa!” Rey bela diri.

Konsekwensi yang musti Rey hadapi, brenti Minum deng Roko ! Sekilas tampak nya maso akal for seorang Rey. Mar itu harga yang harus Rey bayar demi kelanjutan depe hubungan deng Lisa. Depe nya sadap, mulai ada jarak deng tamang2 pamabo. Kalu tamang bae, pasti mangarti. Mar jangan tu tamang2 yang mangiri, nimbole lia orang sanang. Dorang suka Rey capat putus, supaya dorang ada tamang jomblo.

Lisa mo coba trima pa Rey pe diri apa adanya. Dia suka, Rey berubah !


“Qta larang ngana baroko deng baminum, lantaran Qta sayang !! “
( ni kalimat yang salalu ta bayang2 pa Rey pe otak)

45

Asap mikro plus bunyi spiker beking suasana 45 jadi talimburang. Sagala macam, samua ada di pasar 45, dari baju sampe cd, blanga deng sondo, vcd rohani sampe yang nya sensor… ada !! Ni tampa biar mo brapa kali ator, tetap talimburang. Riki pemerintah so pastiu mo tertibkan ni kios2 liar. Apalagi kalo so dekat lebaran ato natal… malimbuku tu umat di 45. Mar katu, ni pasar selain lengkap, murah leh. Otomatis orang2, terutama yang dari gunung lebe pili babli disini. Nya varek biar so ada mall, 45 still survive.

Matt, laki2 pranggang tukang jual dvd. Dari kacili dia so tinggal di 45, deng Papa plus satu orang ade. Matt nya kanal depe Mama. Depe Papa bilang, Mama so di surga. Matt pe kluarga asal inobonto. Mar, pe tau dunia, Matt so di Manado. Dorang tinggal di Texas, sabla Jumbo. Cuma sampe klas 4 SD, Matt so brenti skolah. Dia lebe pilih hidop di 45, yang penting so tau babaca deng baitong. Jadi, dari kacili Matt so rasa bagimana tu kerasnya hidop di bendar. Dia pernah bajual tas plastik, jual koran sampe terakhir bajual dvd. Depe Papa dari dulu nda pernah ganti usaha, jual mainan anak2. Deng ni profesi, dorang bole bertahan hidop.

“Sob, so ada tu SMA2 ?” laki2 gondrong batanya.
“Yah, blum sampe itu noh.. kalu yang surabaya so ada. Itu jo ?” Matt bale tanya.
“Mana2 jo, yang penting made in indonesia, so pastiu tu barat2!” laki2 gondrong dapa lia so nit manahan.

Farid Ahmad, panggilan Matt. Skarang jadi salah satu bandar dvd. Depe bos pe jaringan kuat, jadi banya skali dorang pe stok film. Mulai dari action, drama, komedi, semi sampe yang binatang2. Matt pe pelanggan beragam, dari anak skolah sampe opa2. Sejak dvd mulai top, Matt pe penghasilan jadi mantap. Maklum, di 45 baru sadiki yang bajual dvd. Depe bisae, pas banya doi, tu pengeluaran le jadi banya. Waktu nda banya doi, paling nanti malam minggu baru bagate. Mar skarang, amper tiap malam, Matt bakutamba cari miras. Memang jadi boros, mar jadi akrab deng tu preman2. Kalu biasa Matt ja kase japre 10ribu tiap hari, skarang so nyanda.

“Mas, ada dvd spongebob ngga?” cewe baju putih batanya.
“Oh, yang kartun.. itu dang di sabla kiri.” Matt kase tunjung.

Sunarti, cewe asal jawa yang jadi babysitter. Ati baru tiga bulan di Manado, jadi tu logat jawa masi kantal. Ati kerja pa orang tionghoa, yang punya toko mas di 45. Tu kluarga ada dua anak, tu satu so SD, sdangkan yang bungsu baru lima bulan. Lantaran sibuk mo jaga toko, jadi ni Ci deng Ko sewa babysitter. Ati pun datang ke Manado. So enam taong, Ati jadi babysitter. Jadi tu skill mengasuh bayi so banya. Mar baru kali ini, Ati kaluar pulau Jawa. So itu, dia stenga mati menyesuaikan deng makanan disini. Kalu di Jawa kan nya ada yang pidis2, beda deng disini.. rica sasaja! Lengkali dia musti cari makang di warteg. Mar lama2, Ati mulai betah di manado. Dia sanang lantaran orang2 manado, pambakusedu.. tatawa trus. Skarang Ati so suka makang tinutuan deng so tau apa tu pendo.

Love at the first sight .. ! Matt masi ta bayang2 tu cewe rambu panjang pake baju putih. Depe senyum pas batanya film, beking Matt nya tatidor. Skarang Matt slalu bapake rapi, sapa tau dia datang babli ulang. Matt manyasal nya riki berkenalan. Baru kali ini dia tertarik pa cewe, murni suka..bukang nafsu !! Biasa dia suka cewe karna ja lia tu bodi seksi. Mar skarang laeng, mo bilang seksi, baju suster itu tatutup.. mo bilang vasung, tu cewe nda talalu gaga, cuma manis. Selain manis, mungkin depe inner beauty yang beking Matt tertarik.

“Mas, spongebob seri terbaru ada nda?” Ati batanya.
“aa..da..” Matt bajawab kaku. Dia masi nya percaya, cewe yang dia suka so di muka pa dia.
“kalo dua, brapa yah?” Ati tanya harga.
“mmmh, gratis.. asal cewe mo suka kenalan !!” Matt tangisi-ngisi.
“bener nih? kan mas lagi dagang.. ngga takut rugi ?” Ati tanya ulang.
“ah..apa lah arti 2 dvd, yang penting bole kenalan deng ngana..” Matt trus berjuang.
“…mmmhh..” Ati masi bingo, antara geer, malo deng sanang mo dapa gratis.
“Qta pe nama Matt..” nya tunggu2 lama, Matt langsung kase tau depe judul.
“Ati…” kage ni cewe langsung pigi, nya riki ambe tu dvd.. mungkin dia malo.
“Hei… tunggu !!” Matt bingo, kiapa tu cewe so pigi.
Dusu..nyanda??
“Ton, jaga akang nya lama..” Matt babilang pa depe tamang.

Matt cari dusu pa Ati. Arjuna sementara mencari, dengan membawa dua keping dvd sebagai alasan. Nya susa mo cari cewe pake baju putih suster. Akhirnya Matt riki pa Ati.

“Cewe, tu dvd tatinggal…” Matt coba babilang.
“Biar aja, kan aku ngga bayar..” Ati pe muka merah malo.
“Qta kan so kase… ambe jo !!” Matt coba kase.
“mmmmhh..” lagi2 Ati bingo.
“sapa kote ngana pe nama??” Matt tanya ulang.

Cerita asmara memang paling sadap ja bahas. Akhirnya Matt kenalan deng Ati. Skarang Matt so tau Ati pe tampa tinggal plus no telpon. Nya percuma ja jual dvd. Film2 komedi romantis beking Matt banya referensi for mo kase sanang cewe pe hati. Matt pe pdkt sekitar dua bulan. Dorang dua pe tampa favorit, kalu nda bauni di president, paling minum kopi susu di jarod.

Skarang Ati so lebe suka makang tinutuan deng so tau apa tu cuki.

Keluh Kesah Seorang Adik

Keluh Kesah Seorang Adik
Rasa2 mo manangis kong mo babuang diri. sapa kwa nda mo saki hati kalu cowo beking bagini. So samua Qta kase,sampe tu mahkota yang dorang bilang paling berharga for parampuang Qta so relakan for dia. Pokoknya Qta pe samua dia so rasa. Eh,ternyata dia nimbole dipercaya. tadi jo pas jam istirahat Qta dapariki dia sementara bakusedu deng tu cewe depe tamang satu klas. tamang memang tamang mar masa bakusedu kong sampe ja baku plo? Memang bukang Cuma ini kali dia beking bagini pa Qta. Nintau mo bagimana Qta ini. Kalu kwa torang pe hubungan Cuma biasa2,mungkin Qta nda mo talalu saki hati. Mar ini,torang dua so sama deng laki bini yang amper tiap hari ja melakukan. Qta slalu nda tahang kalu dia so ja barayu. Pokoknya depe latabu slalu beking Qta luluh. Mar sebenarnya biar dia nda rayu, Qta le kwa suka mo rasa ena. Mar tetap biar dalam hati Qta so ingin,ja jual mahal sadiki,pura2 ja tolak padahal so suka.Sampe skarang Qta nda pernah mo lupa tu kejadian pertama kali. waktu itu torang dua ada bacao,kong pi pa tamang pe rumah yang kebetulan kosong depe orangtua ada kaluar kota. Jadi torang bebas dalam rumah. hari itu ada tiga par yang bacao sama2. Pertama torang momasa kong makang. Abis itu torang bauni film,smentara itu tu cowo2 mulai bagate. yang torang bauni film horror,tusuk jelangkung. Tu rumah,torang kunci kong tutu jendela deng horden supaya glap,sama deng di bioskop. Lantaran film horror jadi tu cewe2 baplo,biar tu cowo2 so bobou seho.pas film abis,kage dorang kase lanjut deng film BF. Qta so nda kage,soalnya dari kacili Qta pe sebe hobi ja bauni ni film kong langsung ja praktek pa ajus. Sebe ja putar ni film kalu lia Qta so tidor. Padahal lengkali,Qta Cuma pura2 tidor.pokoknya abis bauni sebe langsung ba minta pa ajus. Kong dorang dua pun “bermain” pa Qt ape sei. Qta lengkali rasa kasiang ja dengar ajus ja bataria.
Jadi pas tamang putar BF,Qta so nda kage. Pas bauni ni film,Qta pe cowo langsung ba plo mesra. Dia so mulai ramas2 Qta pe dada. Rupanya dia so terangsang,apalagi dia kan so minum. Qta le nda malawang. Soalnya Qta penasaran ,bagimana so depe rasa?? Blum riki klar tu film,torang dua langsung pi kamar,bakunci. Ini Qta pe pertama kali,bagimana kang?saki nyanda?kiapa ajus ja babataria? Akhirnya samua itu terjawab. Memang saki kalu pertama. tu dara pe banya ada taseka di sprei. Bagimana katu nda mo bataria? antara saki deng geli yang beking Qta bataria. Pertama kali ini blum beking Qta dapa rasa depe nikmat. Yang dapa lia nikmat Cuma Qta pe cowo,walaupun dia punya saki,mar dia bangga karna bongkar Qta pe poci. Qta nanti rasa nikmat pas torang dua beking untuk yang ketiga kali. Kali ini pa Qta pe kamar. Pas nda ada orang di rumah. Ajus deng sebe pulang kampung,sedangkan Qta pe kaka so nda tinggal di rumah. Mungkin lantaran penasaran,ni kali Qta komang yang agresif. Depe laste nda sia2,Qta bole rasa ena. Dokter2 bilang orgasme. Brapa kali stou ni tampa kincing kase kaluar cairan. Pengalaman ini beking Qta jadi suka mo beking trus. Lantaran tako mo hamil,jadi Qta pe cowo salalu ja pake kondom. mens datang teratur tiap bulan,Qta pun ketagihan mo suka rasa tu ena trus.

Mar ni kali,Qta saki hati da lia pa dia ada bakuplo deng cewe laeng.Qta so terlanjur sayang,depe bukti samua Qta punya,Qta kase pa dia.Ternyata dia nda sungguh2 pa Qta. Biar le Qta sayang,mar kalu so bagini,mo apa leh...So sama jo dia deng Qta pe kaka pe paitua,pambadusta. Abis manis,sepak takraw!! Pas Qta pe kaka bunting,eh tu laki2 brangkat deng tai2. akhirnya Qta pe kaka melahirkan tanpa pendamping. Depe anak skarang Qta pe oma yang jaga. Ada kase basar di kampung,supaya dia nda talalu malo,nda ada papa. Sekarang Qta pe kaka so jadi wanita panggilan. Sejak dia trauma,depe paitua kase tinggal,dia hobi ja bermain cowo. Depe sasaran tu cowo2 kaya. Dia ja minta dorang bli akang baju,cincin deng laen2. Qta pe kaka le katu balas dorang pe bae deng depe tubuh. Akhirnya ta trus,dia jadi lonte high class. Mulai dari pejabat sampe cina2 loleng yang banya doi ja pake pa dia. Skarang dia so ada rumah di perumahan real estate. Lantaran banya doi jadi dia pande urus badan. Tiap minggu dia rutin fines deng erobic. Lengkali dia selingi deng renang. Jadi depe bodi dapa lia seksi trus,padahal so satu anak. Pernah tre dia pigi Singapur for operasi depe bawa pusa. Dia bilang for mo beking span ulang,supaya sama deng cewe2 abg. Rupa2 jo dia itu,mar katu depe profesi ini so bantu2 torang pe kluarga pe ekonomi. Qta pe sebe cuma sopir mikro,sdangkan ajus cuma ibu rumah tangga yang skali2 ja babantu pa orang pe rumah.Qta pe kaka yang beking bagus torang pe rumah. Dia pasang akang tehel.kong bli kulkas,vcd,deng alat2 laeng.Dia bli akang mesin manjae for ajus,supaya kata ada hambak. Skarang ini dia sementara kumpul doi for mo bli akang mikro sandiri for sebe. Sdangkan Qta ,dia biaya akang les komputer deng bahasa inggris. Dia bilang supaya Qta bole langsung cari karja abis lulus sma.

Lengkali Qta ja bapikir,suka mo jadi sama deng Qta pe kaka. Dapa banya doi trus dapa rasa ena dari “pistol” yang berbeda. Qta ini so nda poci,Qta pe cowo so ada cewe laeng.Kiapa tidak Qta ikuti jejaknya kaka?
Akhirnya Qta babilang pa dia,kalu Qta suka mo jadi sama deng dia. Pas dia dengar,dia langsung tampeleng pa Qta. Dia marah,kiapa Qta sampe bapikir bagitu. Dia pun manangis kong jelaskan pa Qta bahwa depe profesi ini bukanlah ladang yang menjanjikan. Memang banya doi mo trima,mar tu beban moral yang mo pikul,brat skali. Orang2 tetap mo pandang enteng walaupun banya doi.Qta pe kaka ba khotbah pa Qta sampe beking Qta sadar.
Cukup jo dia yang jadi bagini. Setidaknya Qta beking sanang orang tua deng jalan yang butul.
Qta pun mulai kase lupa masalah deng Qta pe cowo. Biar jo skarang ini,Qta sandiri. Depe nya sadap,so nda ada orang yang boleh kase rasa ena.

Mar bae leh Qta pe kaka ada kase pinjam dildo....

Agama Cinta

Agama Cinta

Kiapa dorang lidya kandou deng jamal mirdad bole? trus ari deng nia zulkarnaen le bole? kong kiapa Qta deng dia nimbole?nya adil komang ni dia, masa cuma gara2 agama kong torang dua nimbole mo kaweng…?
Amper tiap malam Greg ja pikir tentang tu masalah perbedaan yang ada antara dia deng depe maitua. Somo tiga taong belakangan ini, Greg jalin hubungan deng Dian. Memang depe awal, dorang dua nya tapikir tentang ini perbedaan. Rasa suka yang dorang dua rasa seakan-akan kase tutu ato kase kabur kalu dorang dua ini beda agama. Mungkin yang dorang pikir ini hubungan nda mo lanjut sampe ke taraf serius. Kan saat itu dua2 lagi dalam kondisi yang so pastiu deng kesendirian. Waktu itu Greg so jomblo sekitar dua taong sedangkan Dian amper satu taong nda ada cowo. Jadi pas dorang dua dekat, tanpa pikir tu perbedaan dorang langsung sepakat menjalin tali kasih. Tampang Greg yang pas2an sebenarnya nda cocok deng wajah cantik Dian. Mar ni Greg pe face tatutu deng depe kharisma. Maklum kan Greg itu seorang aktor teater. Apalagi waktu itu, grup teaternya Greg sementara depe top performance. Nyaris tiap hari, dorang muncul di koran. Penampilan deng konsep teater modern beking Teater Kritis langsung melejit. Penikmat seni yang so pastiu deng teater dulu2 langsung jatuh hati. Ni teater slalu tampil mengejutkan diiringi deng keberanian aktor2. Perna dorang pentas nyaris bugil. Sapa yang nya mo heboh kalu lia pertunjukan sama deng ini. Trus tema2 yang Teater Kritis ja bawa salalu mengena deng kondisi yang ada. Jadi Greg pun iko rasa depe imbas jadi public figure. Amper tiap minggu dorang dapa undangan pentas. Dan satu waktu, Teater Kritis dapa undang pentas di malam inagurasinya Fakultas Ekonomi yang salah satu mahasiswanya depe nama Dian. Disini no Greg deng Dian bakudapa. Waktu itu Greg dapa peran utama, tantu perhatian paling banya pa dia. Kalu cewe2 lain tertarik mo badekat pa Greg, laeng halnya deng Dian, dia kurang respek deng Teater Kritis. Ini yang beking Greg penasaran. Pas klar pentas, banya cewe yang badekat. Mar Greg pe mata Cuma tatuju pa satu cewe yang pake baju itam gambar alanis morissete. Depe muka manis trus kuli le itam manis. Greg jadi penasaran kiapa ni cewe nda senyum pa dia, beda denga tu wowene2 laeng. Greg pun langsung inisiatif badekat,kenalan. Biar dapa lia dingin, ternyata ni cewe ramah. Pas Greg kenalan, dia nda pasang muka jaha mar mengembangkan senyum. Setelah kenalan, dorang dua pun bacirita. Cek para cek ternyata ada sebab sampe Dian nda talalu suka Teater Kritis. Depe opa kote aktor teater konvensional alias teater doeloe2. Mau tak mau Dian so ta doktrin dari depe opa kalu teater modern itu nya war2, Cuma cari sensasi. Dorang dua pun terlibat pembicaraan yang beragam. Mulai dari teater sampe musik. Kaos alanis nda ada hubungan deng selera musik Dian. Dia cuma suka pake tu baju lantaran depe corak bagus. Dian sandiri adalah boyband mania. Dari jaman NKOTB sampe Blue dia tahu. Beda jaoh deng Greg yang Rock’n Roll sejati. Jadi Nick Carter bakudapa deng Mick Jagger. Mar ternyata ni perbedaan2 yang beking dorang pe pembicaraan jadi asik. Malam itu dorang dua bakutukar no hp sekalian deng no rumah. Dan seperti yang bisa ditebak dorang dua jadi dekat. Dari bauni sama2 trus lanjut makang berdua sampe bakupinjam komik dorang jalani. Dan akhirnya setelah dua bulan masa penjajakan, Greg memberanikan diri ungkapkan depe perasaan. Dan cinta pun tak bertepuk sebelah, Dian le so suka pa Greg. Bagi Dian, face no dua yang penting tu cowo bole beking dia senyum alias salalu senang. Memang sense of humour yang Greg punya jadi suatu nilai tambah. Dan bukang Cuma Dian yang rasa, samua Greg pe tamang2 salalu terhibur kalu Greg ja bagrap. Hari itu tanggal 21 Juni, dorang dua resmi batona. Perasaan suka yang dorang dua rasa tutupi tu masalah yang sebenarnya sangat krusial, agama. Greg pe papa Penatua kolom sedangkan Dian itu dari kluarga muslim yang taat, slalu sombayng lima waktu. Perbedaan ini bukang jadi penghalang bagi sepasang hati yang so terlanjur saling menyukai. Jadi dorang dua nda mo ambe pusing, mo pikir2 ini masalah. Dan memang butul, slama setahun pertama dorang dua pe hubungan amatlah romantis. Seorang aktor pasti punya jurus2 yang bole beking hati cewe sanang. Depe negatif, aktor le pande ba akting. Jadi lengkali Greg ja badusta, Dian nintau. Hal yang paling banya beking dorang dua bakalae adalah masalah kebiasaannya Greg, minum2. Dan bukan rahasia lagi, kalu aktor itu akrab deng hal2 bagini. Amper salalu, kalu ide lagi mentok dorang ja minum dulu for cari inspirasi. Dan ini yang Dian nimau. For Greg, ini dapa rasa brat, soalnya dia nimbole ja tolak kalu depe tamang ja pangge baminum. Salalu dia alasan mo brenti mar plang2, supaya nda kage. Jadi kalu biasa satu minggu lima hari jadi dua hari dan seterusnya. Kalu Cuma masalah ini nda talalu gawat. Yang sebenarnya dorang dua paling tako yaitu rasa mo kehilangan. Maklum dua2 ada potensi mo balaeng. Greg biar bukang cowo tampan, mar dia itu aktor top, jadi gampang mo dekat deng cewe. Sedangkan Dian, cewe vasung jadi banya tu ada ser. Mar ternyata dorang dua pe rasa tako ini nda terbukti. Dua2 kote memang butul2 serius jalin hubungan. Mungkin masing2 bapikir so bukang depe jaman bermain-main, kan dua2 so dewasa. Cukup jo sampe sma tu bermain2 cowo ato cewe. Dorang dua sama2 sadar kalu ternyata dua2 saling ketergantungan, dua2 saling sayang.
Mar biar tu kisah so romantis tetap ada depe krikil2. Masalah perbedaan lambat laun menguap ke permukaan. Skarang orangtua Greg so tau, dan yang pasti dorang nda rela kalu dorang pe anak mo pindah agama. Masa penatua pe anak mo jadi mualaf, nda mungkin. Bagitu le deng Dian. Biar depe orangtua blum tau, mar dia sandiri le tako mo kase kecewa depe mama deng papa kalu sampe pindah agama.
Tahun pertama, dorang dua nda talalu pusing. Jalani dulu jo, nanti mo lia bagimana. Itu salalu yang jadi dorang dua pe alasan. Mar pas somo maso katiga taong sama2, dorang dua so mulai bingo mo atasi ni masalah. So tiga taong jalani brarti tu hubungan so di tahap yang serius. Sangat serius kalu mo lia dorang pe kadar hubungan. Tau jo anak muda skarang, apa le tu blum ja beking. Jadi bole mo bilang, tu hubungan yang mama deng papa ja beking, dorang le so lakukan. Mar depe mujur, slama dua taong ini Dian pe haid nda perna terlambat. Rupanya dorang dua cukup lihai mo tangani ni masalah. Wajar, kalu inga ni perkembangan jaman. Sex education so bukang hal tabu. Jadi dorang dua so tau tu cara2 for hindari hal2 yang tidak diinginkan.
Waktu trus berlalu, dorang dua pun sebenarnya so suka mo kase lanjut ni hubungan sampe ka tahap yang lebe serius. Mar peraturan negara yang so nda kase pernikahan beda agama beking dorang dua jadi pusing. Dorang so nimau beking dosa trus. Kan kalu so resmi, dorang so nda tako2 mo berbuat.
Dian so sarjana, trus skarang so karja di perusahaan asuransi. Greg pun so jadi dosen di fakultas sastra, dia skarang mengajar teater. Jadi sebenarnya, dari segi materi dorang dua so mampu. Mar biar le so ada penghasilan, tetap dorang nda mampu mo kaweng di luar negri sama deng tu artis2. Tu biaya ka luar negri talalu basar. Greg bilang daripada buang banya ka luar negri, lebe bae tu doi so buka warong ato bli mikro.
Sampe skarang dorang nda kaweng2 padahal so tinggal sama2. Biar cuma ruma kacili, mar ini hasil sandiri, dorang dua pe gaji ada kumpul2. Dan akhirnya Greg so nda maso2 greja, bagitu le deng Dian yang so nda ja sombayang di mesjid. Skarang cinta jadi dorang dua pe agama. Yang penting dorang dua sama2 tau, sapa yang ada kase nafas for dorang.

Lusy

Rumah sandiri!! Akhirnya, Lusy bole bli rumah. So nya perlu mo dengar Tanta Stin, babataria mo tagi doi kos. Dari suar lalah sandiri, Lusy bole kumpul doi for mo bayar ni rumah pe doi muka. Lusy pilih rumah di daerah yang sadiki jaoh dari pusat keramaian. Maklum, Lusy so pastiu deng suasana kota. Dulu depe tampa kos, pas di tengah2 kota. Nimbole mo tidor siang, ribut. Mo tidor malam? nimbole… kan Lusy musti karja !

Lusy itu single parent. Dia ada anak cewe, umur 10, skarang klas 5 SD. Kadang2 dia tinggal deng depe Oma. Mar skarang, lantaran depe Mama so bli rumah, Lita tinggal deng Lusy. Lita pe papa… nintau sapa? nda ada yang mangaku. Mar itu resiko yang musti Lusy trima. Pergaulan bebas pe tau2 !

“ Ma, sbantar Qta mo trima rapor..!” Lita babilang.

“ mmmhhhhh….” Lusy masi sadap da bobo.

“ Ma..sbantar pi di skolah, ambe rapor !! “ Lita bataria.

“ io,io….nanti mama pigi, badiang dulu dang, mama mo tidor !”

Lusy bobo ulang, maklum tadi malam banya karja.

“ Salalu jo, Mama bagitu.. Qta pe skolah nda ja tarukira. Salalu cuma ja kase doi. Qta nda perlu tu doi, Qta mau Mama pe perhatian, sama deng Qta pe tamang2 pe mama….” Lita bacirita sandiri dalam hati.

Sampe klas 5, Lita slalu ja maso 3 besar. Depe Mama da janji, kalu juara 1, dia mo bli akang speda for Lita. So itu, ni smester Lita blajar bae2. Dia so lama ada ingin2 tu speda. Lita pun, pigi skolah deng hati yang berdebar-debar, juara 1 nyanda? Dia so nya sabar mo lia tu rapor.

Mar bagimana dia mo dapa lia tu rapor? napa depe Mama masi tidor. Waktu trima rapor dari jam 9 sampe jam 12. Skarang so stenga 12, so tinggal Lita yang blum ambe rapor. Padahal so dapa tau, Lita itu juara 1. Soalnya Reita, yang biasa juara 1 cuma dapa juara 3. Sdangkan Lucky, yang biasa juara 3, jadi juara 2. Lita sandiri, baru2 juara 2, jadi otomatis tu juara 1 so dapa tau. Ni Lita pe sanang jadi tatutu deng depe ganu pa depe Mama. Biar leh juara 1 mar Mama nda datang, sama deng nyanda !!

Jarum jam so di angka 1. Lusy blum datang2. Lita so lebe ganu. Di satu sisi dia sanang lantaran juara 1. Mar di sisi yang laeng, rasa2 mo manangis.. Mama nda datang2. Tu Wali klas somo pulang, kage dapa lia parampuang vasung cuma pake tank to itam deng jins ketat. Rambu masi basah baru abis cuci. Lusy ternyata masi bole tabangun…

“ Sorri Nci, tadi di jalan macet…” Lusy minta maaf pa Wali klas.

Biar sadiki pastiu, mar Lita akhirnya bole mo tatawa. Depe Mama nimbole kase sambunyi tu rasa bangga pas tau Lita juara 1. Lusy langsung plo pa Lita.

“ Bagitu kwa, Mama pe anak !!” Lusy puji depe anak.

Sesuai janji, Lita mo dapa bli speda. Lusy pe dalam hati, bae leh tadi malam banya pemasukan. Mar kalu bicara tentang Lita, depe anak semata wayang… Lusy rela mo kase apa yang dia bole kase, asal depe anak sanang. Nda sia2 Lusy pe usaha, Lita jadi anak rajin trus prestasi mantap.

Sebelum bli speda, dorang dua makang dulu di KFC..sukuran so dapa juara1. Lusy bilang, mo bli speda pa depe tamang pe toko.

“ Ko, brapa ni speda ? “ Lusy batanya.

“ mmmhh..700 ribu “ Ko bajawab deng gugup, kage da lia pa Lusy.

“ ah, pe mahal… 500 jo neh ! “ Lusy batawar.

“ io jo dank, mar jang se tunjung pa Ci “ Ko masi gugup.

“ Bagitu kwa, nanti beso2 Qta le mo kase diskon !! “ Lusy bagara.

Lita pulang rumah deng perasaan sanang. Juara1 plus speda baru. Lusy sampe rumah langsung bo2 ulang, inga sbantar mo karja sampe pagi. Lita langsung reyen depe speda, kliling kompleks. Lusy kembali ke alam mimpi, ada mo charge, supaya sbantar tenaga prima.

Luciana Margaretha, nick name Lusy. Skarang ini jadi call girls klas elite. Tarif short time babunyi juta, apalagi depe long time. Kiapa Lusy jadi mahal ? Karna dia itu pande ! Pande di otak, pande urus badan, pande barayu en pande jaga reputasi. Dia nda sambarang trima order. Cuma pejabat deng tionghoa. Ada Lusy pe nilai plus, dia jago ba uru… Jadi sebelum melakukan, ba uru dulu. Ini yang banya pejabat suka !! Dalam satu minggu, Lusy pe omzet bole riki 10 juta. Soalnya nda tiap malam dia trima order, selektif !! Jadi pemasukan satu bulan bole tiki 40 juta. Nda heran kalu dia bole ba kredit rumah di kompleks rela estates. Blum tu sedan Honda City, yang katanya asisten 3 pemprov yang kredit akang. Pokoknya, Lusy pe hidop tergolong mewah ! Dia pun musti jaga depe fisik. Tiap bulan dia musti kontrol pa dokter, bapriksa, sapa tau ada virus… Tiap 3 hari dia rutin berenang, trus fitness deng erobic. Memang katu, dia itu profesional.. wajar kalu depe doi banya.

Biar harta melimpah, nya sebanding deng tu orang2 ja haga miring. Perna tre ada tu pejabat pe bini cigi di rambu pa Lusy. Mar itu resiko yang Lusy musti trima. Memang banya doi, mar ni batin nya tentram… orang ja haga sinis. Itu yang jadi di kompleks skarang. Banya tetangga so tau tentang Lusy pe profesi. Dorang ja bakarlota akang tiap hari tentang Lusy. Dorang nda ja kase bergaul tu anak2 deng Lita. Dorang jadi bagitu lantaran sirik, kiapa lonte kong banya doi… padahal Lusy nda perna ganggu dorang pe laki.

Yang paling sewot, Ibu Olla, depe laki penatua kolom. Ni Ibu, anti skali pa Lusy. Dia tu salalu ja bakarlota. Dia pe alasan, tako tu lingkungan mo rusak lantaran ada lonte. Padahal blum tantu yang mo maso surga sapa ?

So itu Lusy so malas ja maso greja di kompleks. Lantaran so banya carita busu, tiap kali persembahan, dorang nda ja kase trus pa Lusy tu pundi. Dorang nimau stou mo trima doi haram. Lusy cuma bole badiang, padahal dalam hati so ancor… manangis… dia rasa2 mo bataria… “ Lonte le itu manusia ciptaan Tuhan” . Lantaran hal2 bagini, beking Lusy malas maso greja. Dia lengkali maso Greja pa depe mama pe rumah. Lusy so nimbole beking apa2, so bagitu katu tu hidop… Masyarakat blum bole trima tu profesi wanita panggilan.

Padahal lonte masi lebe terhormat dibandingkan papancuri doi negara...

Lus, sbantar jam 9 di lobi Ritzy. Pejabat baru !!

sender :

..Ma Ja..

+6281244948xx

sent :

15-jan-2005

13:28:56

Lus, pasang 3 neh, dia kwa blum tau pasaran!

sender :

..Ma Ja..

+6281244948xx

sent :

15-jan-2005

17:03:31

Dimana ngana ? Anak ayam so ada...

sender :

..Ma Ja..

+6281244948xx

sent :

15-jan-2005

21:03:11

So bakudapa ? Dia pake kameja biru

sender :

..Ma Ja..

+6281244948xx

sent :

15-jan-2005

21:10:49

Ok ?? Sbantar Qta tgu di mashosho !!

sender :

..Ma Ja..

+6281244948xx

sent :

15-jan-2005

21:15:21

Kali ini Lusy dapa konsumen baru. Masi nintau harga, jadi bole pasang tinggi2. Pi loby Ritzy, cari om pake kameja biru.

“ Hi...Om Robert stou itu..?!!,penatua kolom, tanta Olla pe laki....“ Lusy haga bingo.

Om Robert leh haga bingo, pongo2 langsung merah....